یمن کے استحکام کی کوششوں کے ضمن میں طارق صالح کی سعودی وزیر دفاع سے ملاقات

یمن کی قیادت کونسل کے رکن طارق محمد صالح نے اعلان کیا ہے کہ انہوں نے سعودی عرب کے وزیر دفاع شہزادہ خالد بن سلمان، سے ملاقات کی اور اس دوران یمن کی تازہ ترین صورت حال پر تبالہ خیال کیا۔

انہوں نے ’ایکس‘ پلیٹ فارم پر بتایا کہ ملاقات میں یمن کے استحکام کی حمایت کے حوالے سے اقدامات پر تبادلہ خیال کیا گیا۔

طارق الصالح نے مزید کہا کہ سعودی وزیر دفاع کے ساتھ ملاقات میں بھائی چارے کے جذبات نمایاں تھے۔

انہوں نے کہا کہ " میں نے سعودی وزیر دفاع شہزادہ خالد بن سلمان سے ملاقات کی۔ اس ملاقات میں بھائی چارے کے جذبے کے ساتھ ہم نے یمن کی موجودہ صورتحال اور یمن کے استحکام اور خطے کی سکیورٹی کے لئے مشترکہ کوششوں کو مضبوط بنانے کے طریقوں پر بات چیت کی۔"

ریاض میں کانفرنس کی تیاری

یہ ملاقات اس کے بعد ہوئی جب سعودی عرب نے یمن کے صدارتی کونسل کے صدر رشاد العلیمی کی درخواست پر مثبت ردعمل دیا، جس میں ریاض میں جامع کانفرنس منعقد کرنے کی تجویز دی گئی تاکہ جنوب کی تمام جماعتیں مکالمے کی میز پر بیٹھ کر جنوبی مسئلے کے منصفانہ حل تلاش کر سکیں۔

یہ یاد رہے کہ یمن کے جنوبی صوبوں کی سیاسی جماعتوں نے گذشتہ جمعہ کی شام اعلان کیا کہ وہ عبوری کونسل کے صدر عیدروس الزبیدی کے یک طرفہ اقدامات کی سخت مخالفت کرتے ہیں، جو انہوں نے جنوبی مسئلے کے سلسلے میں کیے تھے۔

سعودی عرب کی مسلسل کوششیں

سعودی عرب صدارتی کونسل اور اس کی قانونی حکومت کی حمایت کی ہرممکن کوشش کررہا ہے۔ سعودی عرب کی مساعی کا مقصد سیاسی، اقتصادی اور ترقیاتی اقدامات کے ذریعے یمن میں استحکام اور ترقی کو فروغ دینا ہے۔

سعودی عرب یہ بھی واضح کرتا ہے کہ جنوبی یمن کا مسئلہ ایک منصفانہ مسئلہ ہے جسے کسی سیاسی حل میں نظرانداز نہیں کیا جا سکتا، کیونکہ یہ یمن کے قومی مکالمے کے اہم نتائج کا حصہ ہے اور آنے والی کسی بھی سیاسی کارروائی میں اسے اتفاق رائے، وعدوں کی تکمیل اور یمن کے تمام باشندوں کے درمیان اعتماد قائم کرنے کے ذریعے حل کیا جانا چاہیے۔