سعودی ریلوے کا 2025 میں ریکارڈ: 14 ملین مسافروں اور 30 ملین ٹن مال کی نقل و حمل

سعودی ریلوے نے 2025 کے لیے ریکارڈ ساز آپریشنل سنگِ میلوں کا اعلان کیا ہے جس سے مملکت کے نقل و حمل اور سیاحت کے شعبوں کی بنیاد کے طور پر اس کی پوزیشن مستحکم ہوئی ہے۔

سعودی پریس ایجنسی نے اطلاع دی کہ ایس اے آر نے 14 ملین سے زیادہ مسافروں کو سفر کی سہولت فراہم کی جو 2023 میں 11.2 ملین مسافروں میں ایک نمایاں اضافے کی نمائندگی کرتا ہے اور اس سے سفر اور حج دونوں کے لیے ریل کا بڑھتا ہوا استعمال نمایاں ہوتا ہے۔

صنعتی طلب میں اضافہ اور کان کنی کی رسد کے باعث مال برداری کی کارروائیاں 2023 میں تقریباً 24 ملین ٹن سے بڑھ کر موجودہ 30 ملین تک پہنچ گئی ہیں۔

ریل کے ذریعے سفر اور مال برداری کے نتیجے میں 2025 میں 139 ملین لیٹر ایندھن کی بچت ہوئی۔ اس کا مطلب کاربن کے اخراج میں 364,000 ٹن کی کمی بھی ہے جو سعودی گرین انیشیٹو میں براہِ راست معاون ہے۔

یہ اعداد و شمار سفر اور نقل و حمل کی قومی حکمتِ عملی اور سعودی وژن 2030 کو عملی جامہ پہنانے میں ایس اے آر کے اہم کردار کی نشاندہی کرتے ہیں۔ یہ ایک ایسا نیٹ ورک فراہم کرتا ہے جو نہ صرف مؤثر بلکہ ماحولیاتی طور پر پائیدار بھی ہے۔

صحرا کا خواب

گذشتہ سال سے ایک شاندار کارنامے ڈریم آف دی ڈیزرٹ (صحرا کا خواب) کا باضابطہ آغاز ہوا جو شرقِ اوسط اور شمالی افریقہ میں پہلی لگژری ٹرین سروس ہے۔

اطالوی لگژری ہاسپیٹلٹی کمپنی آرسنیل گروپ کی شراکت میں تیار کردہ سروس نے ریل ٹورازم کی نئی تعریف کی ہے۔ ٹرین میں مسافروں کی مرضی کے مطابق ڈیزائن کیے گئے 40 لگژری کیبن "ریل کروز" کا ایک خوبصورت تجربہ فراہم کرتے ہیں جو کلاسک اورینٹ ایکسپریس سے متأثر لیکن ایک الگ سعودی شناخت کے حامل ہیں۔ یہ راستہ ریاض سے القریات تک مملکت سے گذرتا اور ثقافتی ورثے کے کلیدی مقامات بشمول حائل اور جوف پر رکتا ہے جس سے مؤثر طور پر سفر ازخود ایک منزل میں بدل جاتا ہے۔

ٹرانزٹ اورینٹڈ ڈویلپمنٹ کو بنیاد بنا کر فائدہ اٹھانے کے لیے ایک اہم اقدام کے طور پر ایس اے آر نے چھے بلین سعودی ریال کے ریئل اسٹیٹ فنڈ کے قیام کا اعلان کیا ہے جو مکہ مکرمہ پر مرکوز ہے۔

یہ فنڈ مکہ مکرمہ میں حرمین ہائی سپیڈ ریلوے سٹیشن سے متصل اہم زمینوں کی ترقی کے لیے وقف ہے۔ اس اقدام کا مقصد اعلیٰ صلاحیت والے ہوٹل، تجارتی مراکز اور سٹیشن سے براہِ راست منسلک رہائشی یونٹس کی تعمیر کے ذریعے حاجیوں کو زیادہ بہتر تجربہ فراہم کرنا ہے۔

عالمی پہچان

بہترین کارکردگی کے لیے ایس اے آر کے عزم کو بین الاقوامی سطح پر تسلیم کیا گیا ہے اور یہ طویل مسافت کی سیاحتی ٹرینوں کے لیے باوقار انٹرنیشنل یونین آف ریلوے ایوارڈ جیتنے والی اولین کمپنی بن گئی ہے۔

یہ تقریب پیرس، فرانس میں یونین کے ہیڈ کوارٹر میں منعقد ہوئی جس میں تمام دنیا کی بڑی ریلوے کمپنیوں کی بڑی تعداد نے شرکت کی۔

ریل کے بھاری انفراسٹرکچر کے ساتھ لگژری سیاحت کو مربوط کرنے میں ایس اے آر نے جو اختراعی کام کیا ہے، اس کے اعتراف میں ریلوے کی عالمی تنظیم یو آئی سی نے ایوارڈ پیش کیا۔

یہ اعزاز سروس کے معیار کے لیے ایس اے آر کی شہرت کو بہتر کرتا ہے اور ریلوے کے شوقین افراد اور لگژری مسافروں کے لیے مملکت کو ایک اہم مقام دلاتا ہے۔