ایرانی پاسداران انقلاب کا تیل بردار جہاز پر ڈرون حملے کا دعویٰ

ایرانی پاسداران انقلاب نے اعلان کیا ہے کہ جہاز رانی پر عائد پابندیوں کو نظر انداز کرنے کی پاداش میں ایک تیل بردار جہاز کو خودکش ڈرون کے ذریعے نشانہ بنا کر نقصان پہنچایا گیا ہے۔

پاسداران انقلاب نے بیان میں کہا ہے کہ وہ ان امریکی فوج کے "منتظر" ہیں جو آبنائے ہرمز کے ذریعے تجارتی جہازوں کو سکیورٹی فراہم کریں گی۔ واضح رہے کہ امریکہ اور اسرائیل کی ایران کے ساتھ جاری جنگ کے باعث اس وقت آبنائے ہرمز میں جہاز رانی کی نقل و حرکت تقریباً مفلوج ہو کر رہ گئی ہے۔

پاسداران انقلاب کے ترجمان علی محمد نائینی نے امریکی وزیر توانائی کریس رائٹ کے اس اعلان پر تبصرہ کرتے ہوئے کہ امریکی بحریہ اس سٹریٹجک آبنائے میں جہازوں کی نگرانی کے لیے تیار ہے، کہا کہ "ہم ان کا انتظار کر رہے ہیں"۔ فارس نیوز ایجنسی کے مطابق انہوں نے زور دے کر کہا کہ "ہم امریکیوں کو مشورہ دیتے ہیں کہ وہ کوئی بھی فیصلہ کرنے سے پہلے سنہ 1987ء میں امریکی آئل ٹینکر 'برجٹن' کو لگنے والی آگ اور حال ہی میں نشانہ بننے والے تیل بردار جہازوں کو یاد رکھیں"۔

یاد رہے کہ امریکہ اور اسرائیل نے گذشتہ اٹھائیس فروری 2026ءکو ایران کے خلاف بڑے پیمانے پر فوجی آپریشن کا آغاز کیا تھا۔ وائٹ ہاؤس نے وضاحت کی تھی کہ یہ حملہ ایران کی جانب سے مبینہ ایٹمی اور میزائل خطرات کے پیش نظر کیا گیا۔ ان امریکی اور اسرائیلی حملوں کے نتیجے میں ایران کے کئی اہم ترین قائدین ہلاک ہو چکے ہیں، جن میں ایرانی سپریم لیڈر علی خامنہ ای، پاسداران انقلاب کے کمانڈر محمد پاکپور اور مسلح افواج کے چیف آف جنرل سٹاف عبدالرحیم موسوی شامل ہیں۔

دوسری جانب ایرانی پاسداران انقلاب نے بھی جوابی کارروائی کا اعلان کرتے ہوئے اسرائیلی اہداف پر میزائلوں اور ڈرونز سے حملے کیے ہیں۔ اس کے علاوہ بحرین، اردن، قطر، کویت، متحدہ عرب امارات اور سعودی عرب میں موجود امریکی فوجی اڈوں کو بھی نشانہ بنایا گیا ہے۔