تہران کے متعدد علاقوں میں زوردار دھماکے، ایرانی میزائلوں کی اسرائیل پر یلغار

ایران میں جاری جنگ بدھ کے روز اپنے بارہویں دن میں جاری ہے، جہاں ایک طرف امریکی و اسرائیلی فضائی کارروائیوں میں شدت آ گئی ہے تو دوسری جانب ایران اسرائیل اور خلیجی ممالک پر میزائلوں اور ڈرونز سے جوابی حملے کر رہا ہے۔

ایرانی میڈیا نے دارالحکومت تہران میں زوردار دھماکوں کی آوازیں سنے جانے اور شہر کے مغربی و مشرقی علاقوں میں فضائی بمباری کی اطلاع دی ہے۔

اسرائیلی فوج نے مغربی ایران میں ڈرونز داغنے والے ایک یونٹ کو نشانہ بنانے کی تصاویر جاری کی ہیں اور دعویٰ کیا ہے کہ اسرائیل کی طرف ڈرون بھیجنے والے ایرانی اہلکار مارے گئے ہیں۔

اسرائیلی فوج نے بتایا کہ اس نے ایران کی جانب سے اسرائیلی علاقوں کی طرف داغے گئے میزائلوں کے کئی گروپس کا سراغ لگایا اور انہیں فضا میں ہی تباہ کرنے کی کوشش کی۔ اسی دوران اسرائیل نے ایران اور لبنان کے خلاف حملوں کی ایک نئی لہر شروع کی ہے۔ یروشلم میں سائرن بجنے کے ساتھ ساتھ دھماکوں کی آوازیں بھی سنی گئیں۔

اسرائیل کی ہنگامی طبی امداد کی سروس 'ڈیوڈ کریسنٹ' نے فوری طور پر کسی جانی نقصان کی اطلاع نہیں دی تاہم بتایا کہ ان کی ٹیمیں ان چند افراد کو طبی امداد دے رہی ہیں جو حفاظتی پناہ گاہوں کی طرف بھاگتے ہوئے زخمی ہوئے۔ اسرائیلی چینل 12 کے مطابق تل ابیب کے قریب ایرانی میزائلوں کے گرنے سے متعدد افراد کے زخمی ہونے کی اطلاعات ہیں۔

کچھ گھنٹوں بعد اسرائیلی فوج نے اعلان کیا کہ ایران نے میزائلوں کی ایک اور لہر داغی ہے اور متاثرہ علاقوں کے رہائشیوں کو فوری طور پر بنکروں میں جانے کی ہدایت کی گئی۔

دوسری جانب ایرانی پاسداران انقلاب نے ایک بیان میں دعویٰ کیا ہے کہ انہوں نے حیفا میں سیٹلائٹ کمیونیکیشن سینٹر کو نشانہ بنایا ہے۔ بیان میں مزید کہا گیا ہے کہ اسرائیل میں قائم فوجی اڈوں کے علاوہ مشرق وسطیٰ کے دیگر مقامات بشمول عراقی کردستان اور بحرین میں امریکی پانچویں بحری بیڑے کے مرکز کو بھی نشانہ بنایا گیا ہے۔

پاسداران انقلاب کے قریب سمجھے جانے والے ایرانی خبر رساں ادارے 'تسنیم' نے ان حملوں کو جنگ کے آغاز سے اب تک کی سب سے بڑی لہر قرار دیا ہے۔

علاوہ ازیں سعودی عرب، کویت، متحدہ عرب امارات، قطر اور بحرین میں بھی میزائلوں اور ڈرونز کو فضا میں ہی روک کر تباہ کرنے کی اطلاعات موصول ہوئی ہیں۔