مکہ چیمبر نے حج سیزن کے لیے بس گائیڈز کو تربیت دینے کا پروگرام متعارف کروا دیا

مکہ چیمبر آف کامرس نے بس گائیڈنس کی رابطہ کار کونسل کے تعاون سے بیرونِ ملک سے آنے والے عازمینِ حج کی سہولت کے لیے بس گائیڈز پروگرام شروع کیا ہے جس کا مقصد سعودی شہریوں کو حج کے دوران عازمین کی خدمت کے لیے بااختیار بنانا ہے۔

پاکستانی وزارتِ مذہبی امور نے حال ہی میں کہا ہے کہ پاکستان سے پہلی پرواز 18 اپریل کو سعودی عرب کے لیے ملک سے روانہ ہوگی۔

جیسا کہ رائل کمیشن برائے مکہ شہر و مقاماتِ مقدسہ حج 2026 کی تیاریوں کو آگے بڑھا رہا ہے تو مکہ چیمبر کے پروگرام کا مقصد سعودی شہریوں کو بس گائیڈنس کی طرف راغب کرنا اور تربیت دینا ہے تاکہ مقدس مقامات کے درمیان نقل و حمل اور حجاج کا تجربہ بہتر بنایا جائے۔

یہ پروگرام ایک مربوط آپریشنل سسٹم کے ذریعے فراہم کیا جائے گا جو نظم اور حفاظت کے اعلیٰ معیارات پر پورا اترتا ہے۔

پروگرام کے سیشنز میں بس گائیڈز کے کردار اور ذمہ داریوں کا تعارف کروایا جاتا ہے اور ساتھ ہی شرکاء کو فرائض کی مؤثر انجام دہی یقینی بنانے کے لیے خصوصی تربیت دی جائے گی۔

چیمبر نے مشاہدہ کیا کہ یہ پروگرام مقامی افرادی قوت کی حمایت اور متعلقہ اداروں کے ساتھ شراکت داری کو مضبوط بنانے میں اس کے موجودہ کردار کی عکاسی کرتا ہے۔ یہ سعودی ویژن 2030 کے اہداف کے مطابق انسانی سرمائے کی ترقی اور حجاج کی خدمت سے متعلق شعبوں میں سعودیوں کی شرکت بہتر کرتا ہے۔

اس سال حج مئی کے آخری ہفتے میں ہو گا۔