وقت مطالعہ
گھنٹہ
سعودی وزارتِ خارجہ نے مملکت کی جانب سے سخت ترین الفاظ میں اس واقعے کی مذمت اور برہمی کا اظہار کیا ہے ،جس میں کویت کی شمالی سرحدی حدود میں دو بری سرحدی مراکز کو ڈرون طیاروں کے ذریعے نشانہ بنایا گیا، یہ ڈرون مبینہ طور پر عراق سے آئے تھے۔
سعودی عرب نے واضح کیا ہے کہ وہ کسی بھی ریاست کی خودمختاری کی خلاف ورزی اور خطے کے امن و استحکام کو خطرے میں ڈالنے کی سختی سے مخالفت کرتا ہے۔
ساتھ ہی اس بات پر زور دیا گیا ہے کہ عراق کی حکومت کو خلیجی ممالک کو لاحق ان خطرات کے حوالے سے ذمہ داری کے ساتھ کارروائی کرنی چاہیے۔
سعودی عرب نے کویت کے ساتھ اپنی مکمل یکجہتی کا اظہار کرتے ہوئے کہا ہے کہ وہ کویتی حکومت اور عوام کے ساتھ کھڑا ہے اور ان تمام اقدامات کی مکمل حمایت کرتا ہے جو کویت کی خودمختاری، سلامتی اور استحکام کے تحفظ کے لیے کیے جائیں گے۔
