سعودی عرب اور قطر کا امریکہ اور ایران کے درمیان مذاکراتی عمل کی حمایت پر اتفاق

سعودی وزیر خارجہ شہزادہ فیصل بن فرحان کو قطر کے وز یراعظم اور وزیر خارجہ شیخ محمد بن عبدالرحمن کی جانب سے ٹیلی فون کال موصول ہوئی۔

اس دوران فوجی کارروائیوں کے خاتمے کے لیے اسلامی جمہوریہ ایران اور امریکہ کے درمیان دستخط شدہ مفاہمت کی یاد داشت کے تناظر میں سفارتی ثالثی کی کوششوں سے متعلق تازہ ترین پیش رفت کا جائزہ لیا گیا۔ دونوں شخصیات نے مذاکراتی عمل کی حمایت کا اعادہ کیا اور اس امید کا اظہار کیا کہ یہ عمل ایک ایسے پائیدار معاہدے پر منتج ہو گا جو خطے کے امن و استحکام کو مضبوط بنائے۔

دوسری جانب قطر کی خبر رساں ایجنسی نے بتایا کہ شیخ محمد بن عبدالرحمن اور شہزادہ فیصل بن فرحان نے دو طرفہ تعاون کے تعلقات، انہیں سپورٹ کرنے اور فروغ دینے کے طریقوں پر تبادلہ خیال کیا۔ نیز امریکہ اور ایران کے درمیان مفاہمت کی یاد داشت پر دستخط کے بعد خطے میں سکیورٹی اور استحکام کو فروغ دینے کے لیے کی جانے والی سفارتی کوششوں سمیت علاقائی تازہ ترین پیش رفت پر بھی گفتگو کی۔

وزیراعظم اور وزیر خارجہ شیخ محمد بن عبدالرحمن نے امریکہ اور ایران کے درمیان جاری مذاکرات کے لیے قطر کی مکمل حمایت کا اظہار کیا تاکہ بات چیت اور پُر امن ذرائع سے تصفیہ طلب امور کے پائیدار حل تک پہنچا جا سکے۔ یہ اقدامات علاقائی سکیورٹی کو مضبوط بنانے، تعاون، ترقی اور خوشحالی کے لیے نئی راہیں کھولنے اور خطے اور دنیا کے عوام کے مشترکہ مفادات کے حصول میں معاون ثابت ہوں گے۔