قائد اعظم کی بیٹی کی رحلت پر پریتی زینتا کا اظہار افسوس
بھارتی فلمی صنعت کا نمایاں نام پریتی زنٹا ایک وقت میں قائد اعظم محمد علی جناح کے پر نواسے نیس واڈیا کی خاص دوست تھیں اور یہی وجہ ہے کہ انہیں نیس واڈیا کی دادی دینا واڈیا سے بھی ملنے کا موقع ملا جن کا انتقال گذشتہ نیویارک میں اپنے گھر پر ہوا، وہ 98 برس کی تھیں۔
دینا واڈیا کے انتقال پر اپنے دکھ کا اظہار کرتے ہوئے پریتی زنٹا نے ٹوئٹر پر لکھا کہ انہیں دینا کے انتقال کا بےحد افسوس ہے۔ اداکارہ نے یہ بھی کہا کہ وہ خود کو خوش قسمت سمجھتی ہیں کہ ان کی ملاقات دینا سے ہوئی، وہ دینا سے بےحد متاثر تھیں۔
خیال رہے کہ نیس واڈیا پریتی زنٹا کے سابق بوائے فرینڈ تھے، تاہم 4 سال تک ساتھ رہنے کے بعد ان دونوں کے درمیان جھگڑا ہوا، جس کے بعد پریتی نے نیس واڈیا پر ہراساں کرنے کا الزام عائد کر دیا تھا۔
اس کے باوجود پریتی زنٹا نے نیس واڈیا کی دادی دینا واڈیا کے ساتھ گزارے لمحات کو خوشگوار قرار دیا۔
پریتی نے ٹائمز آف انڈیا کو دیے ایک انٹرویو میں بتایا تھا کہ ’میں جب پہلی بار دینا سے ملی، تو میں نے انہیں بہت حیران ہوکر دیکھا، وہ بےحد متاثر کن خاتون تھیں‘۔
