خیبر پختونخوا کے ضلع خیبر کی وادی تیراہ میں تین مختلف مقامات پر سکیورٹی فورسز اور دہشت گردوں کے درمیان فائرنگ کے تبادلے میں چار دہشت گرد ہلاک ہو گئے جبکہ سکیورٹی فورسز کے تین جوانوں نے دفاع وطن پر جان وار دی۔
پاک فوج کے شعبہ تعلقات عامہ (آئی ایس پی آر) کے مطابق وادی تیراہ میں سیکیورٹی فورسز اور دہشت گردوں کے درمیان تین مختلف مقامات پر فائرنگ کا تبادلہ ہوا جس میں چار دہشت گرد سکیورٹی فورسز کی مؤثر کارروائی کے باعث ہلاک ہو گئے۔
تاہم شدید فائرنگ کے تبادلے کے دوران تین جوان اس کارروائی میں کام آئے جن میں ضلع میانوالی سے تعلق رکھنے والے حوالدار انعام گل، ضلع ٹانک کے سپاہی محمد عمران اور ضلع مردان کے سپاہی الطاف خان شامل ہیں۔
بیان میں کہا گیا کہ علاقے میں پائے جانے والے کسی اور دہشت گرد کے خاتمے لیے کلیئرنس آپریشن جاری ہے، پاکستان کی سکیورٹی فورسز دہشت گردی کے خاتمے کے لیے پرعزم ہیں اور ہمارے سپاہیوں کی ایسی قربانیاں ہمارے عزم کو مزید مضبوط کرتی ہیں۔
وزیر اعظم نے دہشت گردوں کو ہلاک کرنے پر افسران و جوانوں کی پذیرائی کی۔
