چیمپئنز ٹرافی ٹورنامنٹ: پاکستان کی آئی سی سی کو ٹیکس استثنیٰ کی منظوری
ٹیکس رعایت کے نتیجے میں آمدنی میں کوئی کمی نہ ہو گی
حکومت نے جمعرات کو اعلان کیا کہ پاکستان کی اقتصادی رابطہ کمیٹی (ای سی سی) نے موجودہ چیمپئنز ٹرافی ٹورنامنٹ 2025 کے سلسلے میں انٹرنیشنل کرکٹ کونسل (آئی سی سی) کے لیے ٹیکس میں رعایت کی منظوری دے دی ہے۔
پاکستان اس ٹورنامنٹ کی میزبانی کر رہا ہے جو تقریباً تین عشروں میں جنوبی ایشیائی ملک میں منعقد ہونے والا آئی سی سی کا ایک بڑا مقابلہ ہے۔ 18 فروری سے نو مارچ تک منعقدہ اس ٹورنامنٹ میں بھارت کے میچز متحدہ عرب امارات (یو اے ای) میں کھیلے جائیں گے۔
جمعرات کو وزیرِ خزانہ محمد اورنگزیب نے ای سی سی کے اجلاس کی صدارت کی جس میں بہترین بین الاقوامی طریقوں کے مطابق آئی سی سی کے لیے ٹیکس استثنیٰ سمیت اہم اقتصادی امور پر تبادلۂ خیال کیا گیا۔
پاکستان کی وزارتِ اطلاعات کے پریس انفارمیشن ڈیپارٹمنٹ (پی آئی ڈی) نے کہا، "آئی سی سی اور پاکستان کے درمیان میزبانی کے حقوق کے معیاری معاہدے کے تحت آئی سی سی کی آمدنی، اس کے ذیلی اداروں، ایسوسی ایٹس، حکام اور غیر رہائشی مندوبین پر کوئی ٹیکس یا کٹوتیاں عائد نہیں ہوں گی۔ ٹیکس رعایت کے نتیجے میں آمدنی میں کمی کی توقع نہیں ہے کیونکہ یہ ٹورنامنٹ کی میزبانی کے حقوق حاصل کرنے کے لیے ایک شرط تھی۔"
پی آئی ڈی نے واضح کیا کہ پاکستانی شہریوں کے ساتھ ساتھ پاکستان کرکٹ بورڈ (پی سی بی) پر ٹورنامنٹ کی آمدنی پر ٹیکس عائد کیا جائے گا۔
پاکستان آٹھ ٹیموں کے آئی سی سی ٹورنامنٹ میں دفاعی چیمپئن کے طور پر شریک ہے جس نے 2017 کے ایڈیشن میں فائنل میں روایتی حریف بھارت کو ایک ناقابلِ فراموش شکست سے دوچار کیا تھا۔ شریک ٹیموں کو دو گروپوں میں تقسیم کیا گیا ہے جس میں میزبان پاکستان، بنگلہ دیش، بھارت اور نیوزی لینڈ کو گروپ اے میں رکھا گیا ہے جبکہ گروپ بی میں افغانستان، آسٹریلیا، انگلینڈ اور جنوبی افریقہ شامل ہیں۔
پاکستان کو کراچی میں ٹورنامنٹ کے افتتاحی میچ میں نیوزی لینڈ کے ہاتھوں 60 رنز سے شکست کا سامنا کرنا پڑا۔ ٹیم 23 فروری کو اپنے اگلے میچ میں دبئی میں روایتی حریف بھارت کے خلاف میدان میں اترے گی اور ٹورنامنٹ میں واپسی کے لیے کوشاں ہو گی۔
