بروکولی سے تیار مرکب جو ذیابیطس کے بچائو میں مددگار ہو سکتا ہے

نئی تحقیق سے یہ بات سامنے آئی ہے کہ اینٹی آکسیڈنٹ سلفورافین، جو بروکولی کے پودوں میں زیادہ مقدار میں پایا جاتا ہے ٹائپ 2 کے مرض میں مبتلا کچھ لوگوں میں بلڈ شوگر کی سطح کو بہتر بنا سکتا ہے۔ نیو اٹلس ویب سائٹ نے نیچر مائیکرو بیالوجی کے جریدے کی رپورٹ کا حوالہ دیا۔

بروکولی غذائیت سے بھرپور غذا ہے اور اس کے بہت سے صحت کے فوائد ہیں۔ تحقیق نے انکشاف کیا ہے کہ یہ کینسر کو روکنے، دل اور ہاضمہ کی صحت کو برقرار رکھنے اور ٹائپ 2 ذیابیطس والے لوگوں کے خون میں شکر کی سطح کو بہتر بنانے میں مدد کر سکتی ہے۔

سویڈن کی یونیورسٹی آف گوتھنبرگ کے محققین کی جانب سے کی گئی ایک نئی تحقیق میں بتایا گیا ہے کہ بروکولی میں موجود نمایاں مرکبات میں سے ایک اینٹی آکسیڈنٹ سلفورافین ٹائپ 2 ذیابیطس والے لوگوں میں خون میں شکر کی سطح کو بھی بہتر بناتا ہے۔

پری ذیابیطس کا فنکشنل علاج

گوتھن برگ یونیورسٹی کے شعبہ نیورو سائنس اور فزیالوجی کے پروفیسر اور اس تحقیق کے سرکردہ محقق اینڈرس روزینگرن نے کہا کہ پری ذیابیطس کے علاج میں فی الحال بہت سے پہلوؤں کی کمی ہے لیکن یہ نئے نتائج بروکولی سے نکالے گئے سلفورافین کے استعمال سے ممکنہ درست علاج کی راہ کھول رہے ہیں۔

روزینگرین جو ٹائپ 2 ذیابیطس کے شکار لوگوں میں بلڈ شوگر کے کنٹرول پر سلفورافین کے اثرات کے بارے میں پچھلی تحقیق میں شامل تھے، نے مزید بتایا کہ طرز زندگی کے عوامل پیشگی ذیابیطس کے کسی بھی علاج کی بنیاد رہتے ہیں۔ ان عوامل میں ورزش، صحت مند کھانا اور وزن میں کمی شامل ہے۔

پری ذیابیطس کیا ہے؟

پری ذیابیطس کے دوران خون میں شکر کی سطح معمول سے زیادہ ہوتی ہے لیکن اتنی زیادہ نہیں ہوتی کہ ٹائپ 2 ذیابیطس کی تشخیص کی ضمانت دے سکے۔ یہ عام طور پر ان لوگوں میں ہوتا ہے جن میں انسولین کے خلاف مزاحمت کی کچھ حد ہوتی ہے یا جن کے لبلبے کے بیٹا خلیے خون میں شکر کو معمول کی حد میں رکھنے کے لیے کافی انسولین نہیں بناتے ہیں۔

عام سکریننگ کا طریقہ

پری ذیابیطس کی سکریننگ کا عام طریقہ یہ ہے کہ روزہ رکھنے والے شخص کے خون میں شکر کی سطح کی پیمائش کی جائے۔ یہ خون میں وہ شکر ہے جو کھانے اور پینے سے متاثر نہیں ہوتی ہے۔ کچھ نہ کھانے کی حالت میں خون میں شکر کی سطح عام طور پر 5.6 ملی مولز فی لٹر اور 7.0 ملی مولز فی لٹر کے درمیان ہوتی ہے۔ اس صورت حال کو ’’ماقبل ذیابیطس‘‘ یا ’’ پری ذیابیطس‘‘ کہتے ہیں۔

موجودہ مطالعہ میں 6.1 اور 6.9 mmol/L کے درمیان فاسٹنگ بلڈ شوگر والے 89 افراد کو شامل کیا گیا تھا۔ شرکاء کا وزن زیادہ تھا۔ ان کی اوسط عمر 63 سال تھی اور اوسطاً فاسٹنگ بلڈ شوگر 6.4 mmol/L تھی۔ شرکاء میں سے 64 فیصد مرد تھے۔

بروکولی سپروٹ ایکسٹریکٹ

شرکا کو تصادفی طور پر 12 ہفتوں تک بروکولی سپروٹ ایکسٹریکٹ ( BSE ) لینے کو کہا گیا۔ بی ایس ای بروکولی میں پائے جانے والے بایو ایکٹیو مرکبات کی ایک مرتکز شکل ہے۔ بروکولی کے چھوٹے پودوں میں بڑے بروکولی سے 100 گنا زیادہ سلفورافین ہو سکتا ہے۔ 12 ہفتوں کے اختتام پر بی ایس ای گروپ میں فاسٹنگ بلڈ شوگر میں 0.4 mmol/L کی اوسط سے زیادہ کمی تھی۔