پانچ صبح کے مشروبات جو بلند فشارِ خون کو قابو میں رکھنے میں مدد دیتے ہیں

صبح کے ابتدائی اوقات پورے دن کی رفتار طے کرتے ہیں۔ جن لوگوں کو بلند فشارِ خون (ہائی بلڈ پریشر) کا مسئلہ ہوتا ہے، ان کے لیے دن کے پہلے مشروب کا پہلا گھونٹ صرف راحت نہیں بلکہ ایک علاج بھی ثابت ہو سکتا ہے۔

مناسب صبح کا مشروب منتخب کرنا دل کے افعال کو بہتر بناتا ہے، خون کی گردش کو تیز کرتا ہے اور جسم کے تناؤ کے ردِعمل کو متوازن رکھتا ہے۔

ہر وہ مشروب جو بظاہر صحت بخش دکھائی دیتا ہے، دل کے لیے فائدہ مند نہیں ہوتا، کیونکہ بعض مشروبات بلڈ پریشر بڑھا سکتے ہیں یا شریانوں پر دباؤ ڈال سکتے ہیں، جیسا کہ ٹائمز آف انڈیااخبار نے بتایا ہے۔

کچھ مشروبات ایسے ہیں ،جو محفوظ ہیں اور سائنسی شواہد سے ثابت شدہ ہیں، جبکہ کچھ ایسے بھی ہیں جن سے پرہیز کرنے کا مشورہ دیا جاتا ہے، جیسا کہ درج ذیل ہے۔

نیم گرم پانی میں لیموں

نیم گرم پانی میں لیموں ملا کر پینا دن کی شروعات کا سب سے آسان طریقہ ہے۔ لیموں میں موجود وٹامن C ایک قدرتی اینٹی آکسیڈنٹ کے طور پر کام کرتا ہے، جو آکسیڈیٹو اسٹریس (oxidative stress) کو کم کرنے میں مدد دیتا ہے اور یہی دباؤ بلند فشارِ خون کے پوشیدہ اسباب میں سے ایک ہے۔

امریکی نیشنل انسٹی ٹیوٹ آف ہیلتھ (NIH) کے جریدے میں شائع ایک تحقیق کے مطابق، وٹامن C سے بھرپور غذاؤں کا باقاعدہ استعمال سِسٹولک بلڈ پریشر (اوپری فشار) میں معمولی کمی لا سکتا ہے۔

یہ مشروب جسم کو ہائیڈریٹ (نم دار) رکھنے میں بھی مدد دیتا ہے، جو خون کی نالیوں کی لچک برقرار رکھنے کے لیے ضروری ہے۔ تاہم یہ بات اہم ہے کہ لیموں والا پانی زیادہ تیزابی (کھٹا) نہ ہو، کیونکہ زیادہ تیزابیت معدے کے حساس افراد کے لیے تکلیف کا باعث بن سکتی ہے۔

چقندر کا جوس

چقندر کا جوس بلند فشارِ خون (ہائی بلڈ پریشر) سے متعلق سب سے زیادہ تحقیق کیے جانے والے مشروبات میں سے ایک بن چکا ہے۔ یہ غذائی نائٹریٹس سے بھرپور ہوتا ہے، جو جسم کو نائٹرک آکسائیڈ پیدا کرنے میں مدد دیتے ہیں۔
یہ ایک ایسا مرکب ہے جو خون کی نالیوں کو پھیلانے اور خون کے بہاؤ کو بہتر بنانے میں اہم کردار ادا کرتا ہے۔

تازہ چقندر کا جوس (بغیر نمک یا چینی کے) ان افراد کے لیے ایک بہترین صبح کا انتخاب ہو سکتا ہے، جو بلند فشارِ خون کو قدرتی طریقوں سے قابو میں رکھنے کے خواہش مند ہیں۔

ناریل کا پانی

ناریل کا پانی پوٹاشیم سے بھرپور ہوتا ہے، جو جسم میں سوڈیم کی سطح کو متوازن رکھنے میں مدد دیتا ہے۔ زیادہ سوڈیم بلند فشارِ خون (ہائی بلڈ پریشر) کی ایک اہم وجہ سمجھا جاتا ہے۔

قدرتی ناریل کا پانی اعتدال کے ساتھ پینے سے الیکٹرولائٹس کا توازن برقرار رہتا ہے اور دل کی دھڑکن کو منظم رکھنے میں مدد ملتی ہے۔ تاہم پیک شدہ ناریل پانی خریدتے وقت لیبل ضرور دیکھنا چاہیے، کیونکہ ان میں بعض اوقات اضافی چینی یا سوڈیم شامل ہوتا ہے، جو اس کی غذائی افادیت کو کم کر دیتا ہے۔

سبز چائے

سبز چائے ایک ہلکی مقدار میں کیفین فراہم کرتی ہے اور ساتھ ہی کیٹیچنز سے بھرپور ہوتی ہے، یہ نباتاتی مرکبات خون کی نالیوں کے افعال کو بہتر بنانے سے جڑے ہیں۔

2014 میں امریکی جریدے Journal of Clinical Nutrition میں شائع ایک تجزیاتی مطالعے کے مطابق طویل مدت تک سبز چائے پینے سے بلڈ پریشر میں معمولی کمی آ سکتی ہے۔

سیاہ کافی کے برعکس جو زیادہ کیفین کی وجہ سے عارضی طور پر بلڈ پریشر بڑھا سکتی ہے، سبز چائے کا اثر زیادہ متوازن اور معتدل ہوتا ہے۔ بہترین نتائج کے لیے اسے ہلکا تیار کرنا بہتر ہے بجائے اس کے کہ بہت زیادہ گاڑھا بنایا جائے۔

املا کا پانی یا جوس

املا (ہندی گوزبری) ایک روایتی پھل ہے جس کی سائنسی بنیاد مضبوط ہے۔ یہ وٹامن C، پولی فینولز اور فلاوونوئڈز سے بھرپور ہوتا ہے، جو دل اور خون کی نالیوں کو آکسیڈیٹیو نقصان سے محفوظ رکھتے ہیں۔

صبح کے وقت ایک چھوٹا کپ املا پانی یا پتلا املا جوس پینا دل اور خون کی نالیوں کی صحت کو قدرتی طور پر بہتر بنانے میں مددگار ہے۔ تاہم اسے نمک یا چینی کے ساتھ نہیں ملا کر پینا چاہیے، کیونکہ یہ دونوں بلڈ پریشر کو قابو میں رکھنے پر منفی اثر ڈال سکتے ہیں۔

مشروبات جن سے پرہیز کرنا چاہیے

کچھ مشروبات بلڈ پریشر کم کرنے میں مددگار ہوتے ہیں، لیکن کچھ دیگر مشروبات الٹا اثر ڈال سکتے ہیں۔ مضبوط کافی اور انرجی ڈرنکس زیادہ کیفین کی وجہ سے عارضی طور پر بلڈ پریشر بڑھا سکتے ہیں۔

پیک شدہ پھلوں کے جوس جو بعض اوقات صحت بخش کے طور پر مارکیٹ کیے جاتے ہیں، اکثر زیادہ چینی پر مشتمل ہوتے ہیں، جو لمبے عرصے میں انسولین مزاحمت اور بلند فشارِ خون کا سبب بن سکتی ہے۔

نمکین دہی پینے کی سفارش نہیں کی جاتی، چاہے وہ تازگی بخش کیوں نہ ہو، خاص طور پر ان افراد کے لیے جو اپنا بلڈ پریشر مانیٹر کر رہے ہیںاور کچھ جڑی بوٹیوں کے مرکبات، جن میں مُولَڑ (Licorice) کی جڑ شامل ہو، ان سے بھی احتیاط برتنی چاہیے، کیونکہ اس میں موجود گلیسریزین بلڈ پریشر کو نمایاں طور پر بڑھا سکتا ہے۔