کے پی: شمالی وزیرستان میں خودکش دھماکہ؛ ایک فوجی سمیت دو افراد شہید

صوبہ خیبر پختونخوا [کے پی] کے ضلع شمالی وزیرستان میں خودکش دھما کے کے نتیجے میں پاکستان فوج کے ایک حوالدار سمیت دو افراد شہید جبکہ 9 افراد زخمی ہوگئے۔

پاک فوج کے شعبہ تعلقات عامہ(آئی ایس پی آر)کے مطابق شمالی وزیرستان کے ہیڈکوارٹر میران شاہ کے بازار میں موٹر سائیکل سوار خود کش حملہ آور نے خود کو سکیورٹی فورسز کی گاڑی سے ٹکرا دیا۔

آئی ایس پی آر کے مطابق خودکش دھماکے میں سکیورٹی فورسز کے اہلکاروں سمیت 9 افراد زخمی بھی ہوئے۔

آئی ایس پی آر نے مزید بتایا کہ دھماکے میں شہید ہونے والے حوالدار محمد امیر کی عمر 30 برس تھی اور ان کا تعلق میانوالی سے تھا۔ واقعے کے بعد فورسز نے علاقے کو گھیرے میں لیکر سرچ آپریشن شروع کر دیا ہے۔