ایران پر حملے سے اسرائیل کے مقاصد حاصل ہو گئے: نیتن یاہو

وزیرِ اعظم بنجمن نیتن یاہو نے اتوار کے روز کہا ہے کہ ایران پر اسرائیل کا ہوائی حملہ "عین درست اور طاقتور" تھا اور اس نے اپنے تمام مقاصد حاصل کر لیے۔

سات اکتوبر 2023 کو حماس کے حملے کی عبرانی کیلنڈر کے مطابق سالگرہ کے موقع پر نیتن یاہو نے ایک تقریر میں کہا، "ہم نے وعدہ کیا تھا کہ ہم ایرانی حملے کا جواب دیں گے اور ہفتے کے روز ہم نے حملہ کیا۔۔ ایران میں حملہ عین درست اور طاقتور تھا جس نے اپنے تمام مقاصد حاصل کیے۔"

نیتن یاہو نے کہا، "ایران نے سینکڑوں بیلسٹک میزائلوں سے اسرائیل پر حملہ کیا اور یہ ناکام ہو گیا۔ ہم نے اپنا وعدہ پورا کیا۔ فضائیہ نے ایران پر حملہ کیا اور ایران کی دفاعی صلاحیتوں اور میزائلوں کی پیداوار کو نشانہ بنایا۔"

ایران نے تصدیق کی کہ اسرائیل نے دارالحکومت کے اردگرد اور دیگر صوبوں میں فوجی مقامات کو نشانہ بنایا اور کہا کہ ان حملوں سے "محدود نقصان" ہوا لیکن چار فوجی ہلاک ہو گئے۔