امریکا ہجرت پر تنقید کرنے والوں کے خلاف متحرک، سوشل میڈیا اکاؤنٹس کی نگرانی شروع

امریکی صدر ڈونلڈ ٹرمپ کی انتظامیہ ملک میں امیگریشن پالیسی کے مخالفین کی شناخت ظاہر کرنے کی کوششیں تیز کر رہی ہے، اس مقصد کے لیے سوشل میڈیا پر ان کی پوسٹس کی نگرانی کی جا رہی ہے۔

اس سلسلے میں محکمۂ داخلی سلامتی نے بڑی ٹیکنالوجی کمپنیوں کو قانونی درخواستیں بھیجی ہیں تاکہ ایسے سوشل میڈیا اکاؤنٹس سے منسلک نام، ای میل ایڈریس، فون نمبر اور دیگر شناختی معلومات حاصل کی جا سکیں ،جو امریکی امیگریشن اینڈ کسٹمز انفورسمنٹ (ICE) پر تنقید کرتے ہیں۔

چار سرکاری عہدیداروں اور ٹیک کمپنیوں کے ان ملازمین کے مطابق جو ان درخواستوں سے واقف ہیں، گوگل اور میٹا (فیس بک اور انسٹاگرام کی مالک) جیسی کمپنیوں کو محکمۂ داخلی سلامتی کی جانب سے سیکڑوں انتظامی سمن موصول ہوئے، جیسا کہ نیویارک ٹائمز نے رپورٹ کیا۔

حکام کا مزید کہنا ہے کہ بعض کمپنیوں نے ان درخواستوں کے ایک حصے پر عمل بھی کیا، تاہم وہ ہر قانونی درخواست کا جائزہ لیتی ہیں، متعلقہ صارفین کو مطلع کرتی ہیں اور جن درخواستوں کو حد سے زیادہ وسیع سمجھتی ہیں انہیں چیلنج بھی کرتی ہیں۔

اکاؤنٹس کی تفصیلات

انتظامی سمنوں میں وزارت نے کمپنیوں سے ایسے اکاؤنٹس کی شناختی معلومات فراہم کرنے کو کہا جو کسی حقیقی شخص کے نام سے رجسٹرڈ نہیں تھے۔

اس دوران اخبار نیویارک ٹائمز نے گزشتہ چھ ماہ میں کمپنی میٹا کو بھیجے گئے دو سمنوں کا بھی جائزہ لیا۔ٹیکنالوجی کمپنیوں نے جنہیں ان درخواستوں پر عمل کرنے یا انہیں مسترد کرنے کا اختیار حاصل ہے، بتایا کہ وہ حکومتی درخواستوں پر ردعمل دینے سے پہلے ان کا جائزہ لیتی ہیں۔ بعض کمپنیوں نے ان افراد کو بھی اطلاع دی جن کا ڈیٹا حکومت نے طلب کیا تھا اور انہیں عدالت میں سمن کو چیلنج کرنے کے لیے 10 سے 14 دن کی مہلت فراہم کی۔

گوگل کی ایک ترجمان نے بیان میں کہا:جب ہمیں کوئی سمن موصول ہوتا ہے تو ہمارا جائزہ لینے کا عمل صارفین کی پرائیویسی کے تحفظ کے ساتھ ساتھ ہماری قانونی ذمہ داریوں کو پورا کرنے کے لیے ترتیب دیا گیا ہے۔

ہم صارفین کو اس وقت مطلع کرتے ہیں، جب ان کے اکاؤنٹ کا ڈیٹا سمن کے تحت طلب کیا جائے، سوائے اس کے کہ کوئی قانونی حکم ہمیں ایسا کرنے سے روکے یا غیر معمولی حالات ہوں۔ ہم ہر قانونی درخواست کا جائزہ لیتے ہیں اور حد سے زیادہ وسیع درخواستوں پر اعتراض کرتے ہیں۔

ٹرمپ پر تنقید کرنے والے اکاؤنٹ کی شناخت

کچھ سوشل میڈیا کمپنیوں نے پہلے بھی صارفین کی معلومات حاصل کرنے کے حکومتی مطالبات کو چیلنج کیا ہے۔ مثال کے طور پر 2017 میں ٹوئٹر (جو اب ایکس کے نام سے جانی جاتی ہے) نے وفاقی حکومت کے خلاف مقدمہ دائر کیا تاکہ ایک انتظامی سمن کو روکا جا سکے جس میں ٹرمپ کی پہلی انتظامیہ پر تنقید کرنے والے اکاؤنٹ کی شناخت ظاہر کرنے کا مطالبہ کیا گیا تھا۔ بعد میں وہ سمن واپس لے لیا گیا۔

اسی طرح گزشتہ ستمبر میں وزارت نے میٹا کو انتظامی سمن بھیجے تاکہ ایسے افراد کی شناخت کی جا سکے جو انسٹاگرام پر ایسے اکاؤنٹس چلاتے ہیں جنہوں نے کیلیفورنیا میں امیگریشن اینڈ کسٹمز انفورسمنٹ (ICE) کی چھاپوں سے متعلق معلومات شائع کی تھیں۔ ان سمنوں کو عدالت میں چیلنج کیا گیا اور جج کے فیصلے سے پہلے ہی محکمۂ داخلی سلامتی نے معلومات کے مطالبات واپس لے لیے۔

محدود استعمال… لیکن بڑھتا ہوا دائرہ

گرفتاری کے وارنٹ کے برعکس جن کے لیے جج کی منظوری ضروری ہوتی ہے، انتظامی سمن خود محکمۂ داخلی سلامتی جاری کرتا ہے۔ ٹیکنالوجی کمپنیوں کے ملازمین کے مطابق ماضی میں اس قانونی طریقے کا استعمال نسبتاً محدود تھا اور زیادہ تر سوشل میڈیا اکاؤنٹس کی شناخت تک محدود تھا جو سنگین جرائم میں ملوث ہوں، جیسے بچوں کی اسمگلنگ۔

تاہم گزشتہ سال کے دوران وزارت نے ان سمنوں کے استعمال میں اضافہ کیا تاکہ سوشل میڈیا پر نامعلوم اکاؤنٹس کی شناخت ظاہر کی جا سکے۔

ٹرمپ انتظامیہ نے امیگریشن اینڈ کسٹمز انفورسمنٹ (ICE) پر ہونے والی تنقید کو محدود کرنے کے لیے مظاہروں میں شریک امریکی شہریوں کی شناخت معلوم کرنے کی کوشش کی۔

منیاپولِس اور شکاگو میں مظاہرین کو بتایا گیا کہ انہیں ریکارڈ کیا جا رہا ہے اور چہرہ شناس ٹیکنالوجی کے ذریعے شناخت کی جا رہی ہے۔

گزشتہ ماہ وائٹ ہاؤس کے سرحدی امور کے عہدیدار ٹام ہومن نے فوکس نیوز کو بتایا کہ وہ ایسے افراد کا ڈیٹا بیس بنانے کی کوشش کر رہے ہیں، جنہیں مداخلت کام میں رکاوٹ ڈالنے یا حملے کے الزامات میں گرفتار کیا گیا ہے۔