امریکی صدر ڈونلڈ ٹرمپ نے منگل کے روز ایک بار پھر زور دیتے ہوئے کہا کہ ایران مذاکرات کرے گا ورنہ اسے ایسی مشکلات کا سامنا ہوگا جو اس سے پہلے کبھی نہیں دیکھی گئیں۔
انہوں نے The John Fredericks Showکو دیے گئے ایک ٹیلیفون انٹرویو میں کہا: مجھے امید ہے کہ ایرانی ایک منصفانہ معاہدے تک پہنچیں گے اور اپنے ملک کی تعمیرِ نو کریں گے۔
ٹرمپ نے مزید کہا کہ ہم نے ایران میں بہت اچھا کام کیا ہے، ہم یہ معاملہ ختم کریں گے اور سب خوش ہوں گے۔
انہوں نے یہ بھی دعویٰ کیا کہ ایران کی بندرگاہوں پر امریکی پابندیاں تہران کو روزانہ لاکھوں ڈالر کا نقصان پہنچا رہی ہیں۔ساتھ ہی انہوں نے ایک بار پھر واضح کیا کہ امریکہ ایران کو جوہری ہتھیار حاصل کرنے کی اجازت نہیں دے گا۔
اچھے معاہدے کے قریب پہنچنا
وائٹ ہاؤس کی ترجمان کیرولائن لیویٹ نے ''فوکس نیوز'' کو بتایا ہے کہ امریکہ ایران کے ساتھ ایک اچھے معاہدے تک پہنچنے کے پہلے سے زیادہ قریب ہے۔
انہوں نے مزید کہا کہ صدر ٹرمپ کی مذاکراتی مہارت اور ایران کے خلاف کی گئی کارروائی اس پیش رفت کی بنیادی وجہ ہے اور یہی عناصر ہیں جنہوں نے فریقین کو ایک ''بہتر معاہدے'' کے قریب پہنچایا ہے۔
اس وقت تک پابندی نہیں ہٹائیں گے جب تک معاہدہ نہ ہو جائے
ٹرمپ نے اپنی سوشل میڈیا ویب سائٹ ''ٹروتھ سوشل'' پر کہا کہ وہ ایران کی بندرگاہوں پر عائد امریکی پابندیاں کسی معاہدے کے بغیر ختم نہیں کریں گے۔
انہوں نے لکھا: یہ پابندیاںجو ہم معاہدہ ہونے تک نہیں ہٹائیں گے، ایران کو مکمل طور پر تباہ کر رہی ہیں۔ وہ روزانہ 500 ملین ڈالر کا نقصان اٹھا رہے ہیں، جو وہ قلیل مدت میں بھی برداشت نہیں کر سکتے۔
بہت سی بمباری ہوگی
امریکی صدر نے متعدد صحافیوں کو دیے گئے ٹیلیفونک انٹرویوز میں کہا کہ وہ اس بات کو انتہائی بعید سمجھتے ہیں کہ دو ہفتوں کے لیے طے پانے والی جنگ بندی میں توسیع کی جائے گی۔
ان کے مطابق یہ مہلت امریکہ کے وقت کے مطابق بدھ کی شام ختم ہو رہی ہے۔انہوں نے ''بلومبرگ ''کو بتایا کہ یہ وقفہ زیادہ دیر برقرار رہنے کا امکان نہیں۔
اسی طرح پی بی ایس کو دیے گئے بیان میں انہوں نے کہا کہ اگر مقررہ مدت تک امریکی مطالبات پورے نہ کیے گئے تو ''بہت سے بم پھٹیں گے ''۔
ایک سوال کے جواب میں کہ ایران کے ساتھ ممکنہ معاہدے سے وہ کیا توقع رکھتے ہیں، ٹرمپ نے مختصر جواب دیا: کوئی جوہری ہتھیار نہیں۔ بات بالکل سادہ ہے۔
وینس کا پاکستان کا دورہ
اسی دوران ایک امریکی وفد پاکستان روانہ ہو رہا ہے تاکہ ایران کے ساتھ مذاکرات کے نئے دور میں شرکت کی جا سکے، یہ بات پیر کے روز فرانس پریس کو مذاکرات سے آگاہ ایک امریکی ذریعے نے بتائی۔ذرائع کے مطابق یہ وفد جلد روانہ ہوگا۔
اس سے قبل امریکی صدر نے اتوار کو اعلان کیا تھا کہ وہ اسلام آباد میں مذاکرات دوبارہ شروع کرنے کے لیے ایک وفد بھیجیں گے، تاکہ 28 فروری کو شروع ہونے والی جنگ کو مستقل طور پر ختم کیا جا سکے، یہ اقدام 22 اپریل کو جنگ بندی کی مہلت ختم ہونے سے پہلے کیا جا رہا ہے۔
اسی دوران ''اکسیوس'' نے امریکی ذرائع کے حوالے سے رپورٹ کیا ہے کہ نائب صدر جے ڈی وینس منگل کے روز ایران سے متعلق مذاکرات کے لیے پاکستان جائیں گے۔
دوسری جانب ایک سینئر ایرانی عہدیدار نے کہا ہے کہ تہران سنجیدگی سے پاکستان میں ممکنہ مذاکرات میں شرکت پر غور کر رہا ہے، تاہم ابھی حتمی فیصلہ نہیں کیا گیا۔ ان کے مطابق پاکستان ایران کی بحری ناکہ بندی ختم کرانے اور اسے مذاکرات میں شامل کرنے کے لیے مثبت کردار ادا کر رہا ہے۔
2015 کا معاہدہ
یاد رہے کہ امریکی اور ایرانی فریقین نے اسلام آباد میں ایک ہفتے سے زائد قبل براہِ راست مذاکرات کا پہلا دور کیا تھا، یہ بات 28 فروری کو شروع ہونے والی جنگ کے تقریباً 40 دن بعد سامنے آئی۔
تاہم یہ بات چیت کسی معاہدے تک نہ پہنچ سکی کیونکہ بعض حساس امور ابھی تک حل طلب ہیں۔
اپنی پہلی مدتِ صدارت میں ڈونلڈ ٹرمپ نے 2018 میں امریکہ کو ایران کے جوہری معاہدے جامع مشترکہ لائحہ عمل (JCPOA) سے نکال لیا تھا اور اسے ''دنیا کا بدترین معاہدہ'' قرار دیا تھا۔
واضح رہے کہ 2015 میں طے پانے والے اس معاہدے پر ایران کے ساتھ ساتھ امریکہ، فرانس، جرمنی، چین، برطانیہ اور روس بھی شامل تھے۔
اس معاہدے کی تیاری میں تقریباً دو سال لگے اور اس عمل میں تقریباً 200 ماہرین شامل تھے، جن میں جوہری طبیعیات، پابندیوں، مالیات اور قانون کے ماہرین شامل تھے۔
