یومِ نکبہ:اقوامِ متحدہ میں پاکستانی مندوب کامغربی کنارے،غزہ پراسرائیلی قبضہ ختم کرنےپر زور

اقوامِ متحدہ میں پاکستان کے مندوب عاصم افتخار احمد نے جمعے کے روز فلسطینی علاقوں پر اسرائیل کا غیر قانونی قبضہ ختم کرنے کا مطالبہ کرتے ہوئے کہا ہے کہ فلسطینیوں کی ایک اور نسل میں نکبہ جاری نہیں رہنا چاہیے۔

انیس سو اڑتالیس میں اسرائیل کے قیام کی وجہ بننے والی جنگ کے دوران 750,000 سے زیادہ فلسطینیوں کی وسیع نقلِ مکانی اور بے دخلی کی یاد میں ہر سال 15 مئی کو یومِ نکبہ منایا جاتا ہے۔

اس موقع پر فلسطینی عوام کے ناقابلِ تنسیخ حقوق کے اطلاق سے متعلق اقوامِ متحدہ کی کمیٹی سے خطاب کرتے ہوئے احمد نے کہا، دنیا غزہ میں ایک نئے نقبہ کا مشاہدہ کر رہی ہے جسے روکنا ضروری ہے۔

انہوں نے کہا، "نکبہ کو فلسطینیوں کی ایک اور نسل تک جاری نہ رہنے دیا جائے۔ انصاف، احتساب اور غیر قانونی قبضے کے ذریعے لازماً اس کا خاتمہ ہونا چاہیے۔"

نیز کہا، "بین الاقوامی برادری کو لاکھوں فلسطینی پناہ گزینوں کے لیے اپنی مسلسل سیاسی اور مالی مدد کو یقینی بنانا چاہیے۔ اس برسی کے موقع پر صرف یاد کافی نہیں ہے۔"

پاکستان فلسطینی عوام کے حقِ خود ارادیت، آزادی اور وقار کی جدوجہد میں ان سے اپنی غیر متزلزل یکجہتی کا اعادہ کرتا ہے۔

پاکستان نے مستقل مزاجی سے فلسطینیوں کے جائز حقوق بشمول فلسطینی ریاست کے قیام کی حمایت کی ہے جس کا دارالحکومت القدس الشریف ہو۔