سعودی عرب شاہ سلمان کی سرپرستی میں 10-11 جون کو ویڈیو کانفرنس کے ذریعے عرب بین الپارلیمانی یونین (اے آئی پی یو) کی 39ویں کانفرنس کی میزبانی کرے گا۔
سعودی شوریٰ کونسل اور اے آئی پی یو کے زیرِ اہتمام اجلاس میں کئی علاقائی تنظیموں کے مندوبین کے ساتھ عرب پارلیمنٹ اور قانون ساز کونسل کے سپیکر بھی شامل ہوں گے۔
شوریٰ کونسل کے سپیکر شیخ عبداللہ بن محمد آلِ الشیخ نے کہا، شاہی سرپرستی ان کوششوں کے لیے سعودی حمایت کا مظہر ہے جو مشترکہ عرب تعاون اور علاقائی سلامتی و استحکام کو تقویت دینے کے لیے ہو رہی ہیں۔
انہوں نے کہا، مشترکہ چیلنجز کا مقابلہ، اتحاد کے قیام اور عرب دنیا میں ترقی و انضمام کو فروغ دینے کے لیے عرب پارلیمانی ہم آہنگی ضروری ہے۔
الشیخ نے توقع ظاہر کی ہے کہ یہ کانفرنس پارلیمانی سفارت کاری کو مضبوط بنائے گی اور علاقائی و بین الاقوامی سطح پر عرب مسائل پر رابطہ کاری میں معاون ہو گی۔
دمشق میں 1974 میں قائم کردہ اے آئی پی یو ایک علاقائی ادارہ ہے جو عرب پارلیمانوں کے درمیان تعاون کو مستحکم، علاقائی و بین الاقوامی مسائل پر مؤقف کی رابطہ کاری، عرب یکجہتی و قومی سلامتی کی حمایت اور مکالمے، نمائندہ جمہوریت اور انسانی حقوق کو فروغ دینے کے لیے کوشاں ہے۔
اے آئی پی یو کی 38ویں کانفرنس کی میزبانی تین مئی 2025 کو الجزائر نے کی تھی۔
