اسدی فوج کی بمباری، زہریلی گیس سے متعدد شہری بے ہوش

شام میں انسانی حقوق کے کارکنان کی طرف سے کہا گیا ہے کہ اسدی فوج نے شمال مغربی شہر سراقب میں زہریلی گیسوں سے تیار کردہ بموں سے حملہ کیا ہے جس کے نتیجے میں متعدد افراد زہریلی گیس سے دم گھٹنے سے متاثر ہوئے ہیں۔

انسانی حقوق کے لیے کام کرنے والے ادارے’آبزرویٹری‘ کی طرف سے جاری کردہ ایک بیان میں کہا گیا ہے کہ گذشتہ روز اسدی فوج کے جنگی طیاروں نے سراقب شہر میں بمباری کی جس کے نتیجے میں کم سے کم 5 افراد دم گھٹنے سے زخمی ہوئے ہیں۔

ذرائع کا کہنا ہے کہ ممکنہ طورپر بمباری کرنے والے طیارے روسی ہوسکتے ہیں۔ اطلاعات کے مطابق مبینہ روسی جنگی طیاروں نے ادلب کے جنوبی علاقے معرۃ النعمان میں ایک اسپتال پر بمباری کی جس کے نتیجے میں اسپتال کا نظام درہم برہم ہوگیا ہے۔

آبزرویٹری کے مطابق اسدی فوج نے سراقب میں متعدد مقامات پر ہیلی کاپٹروں کے ذریعے بم باری کی جس کے نتیجے انتہائی بدبودار گیس پھیل گئی اور کم سے کم پانچ افراد دم گھنٹے سے بے ہوش گئے۔

آبزویٹری نے مقامی طبی ذرائع اور عینی شاہدین کے حوالے سے بتایا ہے کہ ہیلی کاپٹروں کے ذریعے زہریلی گیس والے بم گرائے گئے جس کے نتیجے میں کئی افراد دم گھٹنے سے متاثر ہوئے ہیں۔ تاہم اس زہریلی گیس کی نشاندہی نہیں ہوسکی ہے۔

انسانی حقوق آبزرور رامی عبدالرحمان نے بتایا کہ معمرۃ النعمان اور اس کے اطراف میں ایک اسپتال پر وحشیانہ بمباری کی گئی جس کے نتیجے میں اسپتال میں طبی سرگرمیاں معطل ہوگئی ہیں۔

بمباری کے نتیجےمیں معصران کے مقام پر کم سے کم دو شہری مارے گئے۔

ادھر معرہ النعمان کے قریبی علاقے کفر نبل میں بمباری کے نتیجے میں چھ افراد کے مارے جانے کی اطلاعات ہیں۔

خیال رہے کہ شام میں اسدی فوج کی جانب سے زہریلی گیس سے تیار کردہ ہتھیاروں کا بے دریغ استعمال کوئی نئی بات نہیں۔ 22 جنوری کو اسدی فوج نے مشرقی دمشق کے محاصرہ زدہ علاقے دوما میں ایسے ہی مشکوک زہریلی گیس کا استعمال کیا جس کے نتیجے میں 21 شہری دم گھٹنے سے متاثرہوئےتھے۔

انسانی حقوق کی تنظیموں کے مطابق اپریل 2017ء کو اسدی فوج نے شمال مغربی شہر ادلب میں خان شیخون کےمقام پر مہلک گیس کا استعمال کیا تھا جس کے نتیجے میں 87 افراد لقمہ اجل بن گئے تھے۔ اقوام متحدہ نے زہریلی گیس کے نتیجے میں شہریوں کے قتل عام کی ذمہ داری شامی حکومت پرعاید کیا تھا۔