عراقی سکیورٹی فورسز نے مظاہرین کے خلاف مہلک طاقت کا استعمال کیا : ہیومن رائٹس واچ

انسانی حقوق کی بین الاقوامی تنظیم ہیومن رائٹس واچ کا کہنا ہے کہ عراقی سکیورٹی فورسز نے رواں ماہ بصرہ صوبے میں احتجاجی مظاہروں کے دوران احتجاج کرنے والوں پر فائرنگ کی اور مظاہرین کو زدوکوب کیا۔

تنظیم نے اپنی رپورٹ میں تصدیق کی ہے کہ وزارت داخلہ کی فورسز نے احتجاج کرنے والوں کے خلاف بڑی اور غیر ضروری حد تک مہلک طاقت کا استعمال کیا۔

رپورٹ کے مطابق مظاہروں کے دوران 3 افراد ہلاک اور کم از کم 47 زخمی ہو گئے۔ ان میں دو بچوں پر فائرنگ کی گئی اور ایک بچّے کو بندوق کا بٹ مارا گیا۔

ہیومن رائٹس واچ نے باور کرایا کہ سکیورٹی فورسز نے براہ راست گولہ بارود استعمال کرنے کے علاوہ پتھراؤ بھی کیا اور کم از کم 47 افراد کو بری طرح پیٹا جن میں 29 کو گرفتاری کے دوران یا اس کے بعد زدوکوب کیا گیا۔ اس دوران مظاہرین نے سکیورٹی فورسز پر پتھراؤ کرنے کے علاوہ اُن پر پٹرول بم اور جلتے ہوئے ٹائر پھینکے۔