عرب اتحاد کا امریکا سے اتحادی طیاروں کو فضا میں ایندھن کی فراہمی روک دینے کا مطالبہ
یمن میں آئینی حکومت کو سپورٹ کرنے والے عرب اتحاد نے امریکا سے مطالبہ کیا ہے کہ وہ یمن میں اتحاد کے طیاروں کو فضا میں ایندھن کی فراہمی کا سلسلہ روک دے۔ عرب اتحاد کے مطابق سعودی عرب اور اتحاد کے رکن ممالک نے فضا میں اپنے طیاروں کو ایندھن فراہم کرنے کے شعبے میں اپنی صلاحیتوں میں اضافہ کر لیا ہے۔
سعودی خبر رساں ایجنسی "SPA" نے ہفتے کو علی الصبح عرب اتحاد کا بیان جاری کیا جس میں مزید کہا گیا ہے کہ صلاحیتوں میں اضافے کی روشنی میں امریکا میں اپنے حلیفوں سے مشاورت کے بعد عرب اتحاد نے امریکی جانب سے مطالبہ کیا ہے کہ وہ یمن میں جاری کارروائیوں میں اتحادی طیاروں کو فضا میں ایندھن فراہم کرنا روک دے۔
عرب اتحاد کی قیادت نے اس امید کا اظہار کیا کہ "اقوام متحدہ کی سرپرستی میں آئندہ مذاکرات کا نتیجہ سلامتی کونسل کی قرارداد 2216 کے سلسلے میں اتفاق رائے کی صورت میں سامنے آئے گا۔ اس کے تحت ایران نواز حوثی ملیشیا کی جانب سے برادر یمنی عوام اور خطّے کے ممالک پر حملوں کا سلسلہ رک جائے گا۔ علاوہ ازیں بیلسٹک میزائل اور ڈروان طیاروں کی شکل میں درپیش مسائل بھی قابو میں آئیں گے"۔
دوسری جانب ایک امریکی عہدے دار نے باور کرایا ہے کہ واشنگٹن - امریکا کی طرف سے اتحادی طیاروں کو فضا میں ایندھن کی فراہمی روکنے کے حوالے سے سعودی عرب کے مطالبے کی تائید کرتا ہے۔
اسی حوالے سے ذرائع نے العربیہ نیوز چینل کو بتایا ہے کہ سعودی عرب کے پاس اپنے لڑاکا طیاروں کو فضا میں ایندھن فراہم کرنے کی غرض سے 21 طیارے ہیں جب کہ متحدہ عرب امارات اس مقصد کے لیے 6 طیارے رکھتا ہے۔
