نئے ہجری سال کے آغاز پر یہودی شرپسندوں کی مسجد اقصیٰ کی بے حرمتی

نئے اسلامی (ہجری) سال کے پہلے روز اتوار کی صبح قریبا 90 یہودی انتہا پسندوں نے مسجد اقصیٰ کے صحن میں دھاوا بولا اور مقدس مقام کی بے حرمتی کی ہے۔

العربیہ ڈاٹ نیٹ کی نشر کردہ ایک فوٹیج میں مسلمانوں کے قبلہ اول پر دھاووں میں سخت گیر اسرائیلی وزیر زراعت اوری ایرئیل کو دیکھا جا سکتا ہے۔

العربیہ ڈاٹ نیٹ کے نامہ نگار کے مطابق مسجد اقصیٰ کے قریب فلسطینیوں نے فلسطینی پرچم لہرایا تھا جسے قابض فوج نے کافی پریشانی سے اتارا۔

خیال رہے کہ گذشتہ ماہ اردن کی وزارت خارجہ نے عمان میں اسرائیل کے سفیر کو طلب کرتے ہوئے مسجد اقصیٰ پر یہودی آباد کاروں کے دھاووں کی مذمت کرتے ہوئے مسجد اقصیٰ میں اسرائیلی مداخلت کو مسترد کر دیا تھا۔

مشرقی بیت المقدس میں موجود تمام مقدس مقامات اور حرم قدسی اردن کے اسلامی اوقاف کے زیر انتظام ہے مگر ان مقامات پر اسرائیلی فوج اور پولیس کا تسلط قائم ہے۔