ریاض : AI کے مستقبل کا بہترین تصور ، ایلون مسک نے کتاب تجویز کر دی

امریکی ارب پتی ایلون مسک منگل کے روز سعودی دارالحکومت ریاض میں قصر اليمامہ میں صدر ڈونلڈ ٹرمپ کے ہمراہ نظر آئے۔ مسک، جو ٹیسلا اور اسپیس ایکس کے سربراہ اور نئی AI کمپنی XAI کے بانی بھی ہیں، سعودی-امریکی سرمایہ کاری فورم میں شریک ہوئے جو صدر ٹرمپ کے دورے کے موقع پر منعقد ہوا۔

فورم میں خطاب کے دوران ایلون مسک نے ایک سائنسی افسانوی کتاب "The Culture" کی بھرپور تعریف کی، جسے انھوں نے مصنوعی ذہانت کے مستقبل کا بہترین تصور قرار دیا۔ یہ کتاب اسکاٹش مصنف ایان ایم بینکس کی تخلیق ہے۔ ان میں ایک ایسی ترقی یافتہ خلائی تہذیب کا ذکر ہے جو جنگ، غربت اور بیماری سے پاک ہے، جہاں انتہائی ذہین مصنوعی ذہانت خود مختار طریقے سے معاشرے کی نگرانی اور رہنمائی کرتی ہے۔ اس تہذیب میں انسانوں کو مکمل آزادی حاصل ہے، اور وہ اپنی مرضی سے جسم، جنس، عمر اور طرزِ زندگی کا انتخاب کرتے ہیں۔

سعودی-امریکی سرمایہ کاری فورم

ایلون مسک کی سعودی ولی عہد شہزادہ محمد بن سلمان اور صدر ٹرمپ سے مصافحہ اور مختصر بات چیت کی تصویریں بھی سامنے آئیں، جس میں تینوں شخصیات خوش گوار موڈ میں نظر آئیں۔ بعد ازاں فورم میں دیگر بڑی ٹیک کمپنیوں کے سربراہان جیسے اوپن اے آئی، میٹا، ایمیزون، اینویڈیا اور دیگر نے بھی شرکت کی۔

یہ فورم مصنوعی ذہانت پر مرکوز رہا، خاص طور پر اس تناظر میں کہ ولی عہد سعودی عرب نے ایک نئی کمپنی "ہیوماين" کے قیام کا اعلان کیا ہے، جو پبلک انویسٹمنٹ فنڈ (PIF) کے تحت کام کرے گی۔ اس کا مقصد عربی زبان میں بہترین AI ماڈلز کی تیاری، اگلی نسل کے ڈیٹا سینٹرز، کلاؤڈ کمپیوٹنگ انفرا اسٹرکچر، اور جدید ٹیکنالوجی کی ترقی میں سرمایہ کاری کرنا ہے۔ اس اقدام کو سعودی عرب میں AI کے فروغ اور خطے میں ٹیکنالوجی کی قیادت کے لیے اہم پیش رفت قرار دیا جا رہا ہے۔