چار ملین کیپٹاگون گولیاں سمگل کرنے کی کوشش ناکام بنا دی گئی: شام

شامی حکام نے پیر کے روز اعلان کیا ہے کہ انہوں نے کیپٹاگون کی چالیس لاکھ گولیاں سمگل کرنے کی کوشش ناکام بنا دی ہے۔ یہ کہ ایک ایمفیٹامین نما نشہ آور دوا ہے جس کی خطے میں بہتات ہے۔

وزارتِ داخلہ نے ایک بیان میں کہا، حکام نے "چالیس لاکھ سے زیادہ کیپٹاگون گولیاں ضبط کیں جو ایسے صنعتی آلات کے اندر مضبوطی سے چھپائی گئی تھیں جو انسانی استعمال والا آٹا تیار کرتے ہیں۔"

بیان میں کہا گیا ہے کہ انہوں نے "ملک سے باہر سمگلنگ کے لیے تیار کردہ منشیات کی کھیپ کے بارے میں ہمارے ذرائع سے موصولہ درست معلومات پر کارروائی کی ہے جو صنعتی آلات کے اندر چھپائی گئیں۔"

اسد کی حکمرانی میں 2011 میں شروع ہونے والی خانہ جنگی کے دوران کیپٹاگون شام کی سب سے بڑی برآمدی شے بن گئی اور ان کی حکومت کے لیے غیر قانونی فنڈنگ کا ایک اہم ذریعہ تھی۔

گذشتہ دسمبر میں اسد کی معزولی کے بعد سے نئے اسلام پسند حکام نے گوداموں اور فوجی مراکز سے لاکھوں کیپٹاگون گولیاں برآمد کی ہیں۔

وزارتِ داخلہ نے کہا کہ تازہ ترین کارروائی میں ملوث افراد کو "گرفتار کر کے پبلک پراسیکیوشن کے جاری کردہ فیصلے کی بنیاد پر تفتیش کے لیے بھیج دیا گیا اور منشیات پر مشتمل سامان ضبط کر لیا گیا۔"

گذشتہ ہفتے شامی حکام نے ایک ماہ کے طویل آپریشن کے بعد تقریباً 90 لاکھ کیپٹاگون گولیاں قبضے میں لینے کا اعلان کیا جو ترکی بھیجی جا رہی تھیں۔

شام میں نئے حکمرانوں کی کوششوں کے باوجود منشیات کی سمگلنگ جاری ہے اور ہمسایہ ممالک کبھی کبھار بڑی مقدار میں کیپٹاگون اپنے قبضے میں لے لیتے ہیں۔

عراقی سکیورٹی فورسز نے مارچ میں براستہ ترکی شام سے سمگل کی گئی ایک ٹن سے زیادہ کیپٹاگون پکڑی تھیں اور اردن نے اپریل میں شام سے سمگلنگ کی ایک کوشش ناکام بنا دی جس میں "لاکھوں" کیپٹاگون گولیاں ضبط کر لی گئی تھیں۔