غزہ معاہدے کے مذاکرات کے ساتھ فوجی کارروائیاں جاری رہیں گی: اسرائیلی سکیورٹی عہدیدار

ایک اسرائیلی سکیورٹی اہلکار نے ہفتے کو اعلان کیا ہے کہ اسرائیل اور حماس کے درمیان غزہ معاہدے کے مذاکرات "آگ کے نیچے" چلیں گے۔ انہوں نے یہ بھی کہا کہ غزہ میں لڑائی اس وقت تک جاری رہے گی جب تک جنگ بندی اور قیدیوں کے تبادلے کے معاہدے پر دستخط نہیں ہو جاتے۔

اسرائیلی میڈیا کے مطابق اسرائیلی فوج کے سینئر حکام نے کہا کہ غزہ میں افواج طے شدہ منصوبوں کے مطابق زمینی کارروائی جاری رکھے ہوئے ہیں۔ علاقوں کو کنٹرول کر رہی ہیں اور منظم صفائی کی کارروائیاں کر رہی ہیں اور حماس کے ساتھ جنگ بندی سے متعلق رابطے زمین پر افواج کی سرگرمی کی نوعیت پر اثر انداز نہیں ہو رہے۔

حماس کا مرکز ثقل

انہوں نے یہ بھی بتایا کہ غزہ میں اس وقت پانچ فوجی ڈویژن زمینی کارروائی میں حصہ لے رہی ہیں اور بنیادی کارروائیاں شمالی پٹی میں مرکوز ہیں۔ الشجاعیہ اور الزیتون کے محلوں میں، غزہ سٹی کے مضافات میں اور جنوبی پٹی میں خان یونس کے علاقے میں کارروائیاں جاری ہیں۔ اسی طرح اسرائیلی کابینہ غزہ سٹی اور وسطی کیمپوں میں حماس کے مرکز ثقل کے علاقوں میں اسرائیلی فوج کی کارروائی پر تبادلہ خیال کرے گی جہاں ان علاقوں تک پہنچنا قیدیوں کی جان کو خطرے میں ڈال سکتا ہے۔

اسرائیلی وفد کی مذاکرات کیلئے دوحہ روانگی

یہ اس وقت ہو رہا ہے جب اسرائیل اتوار کو دوحہ میں غزہ کی پٹی میں جنگ بندی کے معاہدے پر گہری بات چیت کے لیے ایک وفد بھیجنے کی تیاری کر رہا ہے اور حماس نے جنگ بندی تجویز کا ایک "مثبت" جواب بھیجا ہے لیکن اس میں 3 مسائل پر "ترمیمات" شامل کی ہیں۔ حماس نے اسرائیلی افواج کی پوزیشننگ، امداد کے مسئلہ اور جنگ کے خاتمے کے حوالے سے معاہدے میں ترامیم کا کہا ہے۔