غزہ پر اسرائیلی بمباری میں شدت، سرحد پر بڑی تعدادمیں ٹینکوں کی آمد

اسرائیلی فوج نے غزہ کے مختلف علاقوں پر اپنی کارروائی تیز کرتے ہوئے الزیتون اور الصبرہ کے رہائشی محلوں کو نشانہ بنایا جہاں پوری پوری آبادی کو بمباری اور ڈرون کے ذریعے تباہ کیا گیا۔ عینی شاہدین کے مطابق مکانات کے درمیان بارودی آلات پھاڑے گئے جس سے بڑے پیمانے پر جانی و مالی نقصان ہوا۔

جاں بحق ہونے والوں کی تعداد میں اضافہ

غزہ کی طبی ذرائع کے مطابق آج صبح سے اب تک اسرائیلی حملوں میں کم از کم 40 فلسطینی جاں بحق ہو چکے ہیں۔ العربیہ اور الحدث کے نمائندے کے مطابق پچھلے 24 گھنٹوں کے دوران اسرائیلی بمباری میں 100 فلسطینی اپنی جانیں گنوا بیٹھے۔

سرحد پر اسرائیلی ٹینکوں کی تعیناتی

کارروائی کے ساتھ ہی غزہ کی سرحد پر اسرائیلی ٹینکوں کی بڑی تعداد دیکھی گئی ہے۔ یہ تعیناتی اس وقت سامنے آئی ہے جب اسرائیلی کابینہ کا اجلاس غزہ پر مکمل قبضے کے فیصلے پر غور کے لیے منعقد کیا جا رہا ہے۔

کابینہ اجلاس اور احتجاجی مظاہرے

بنجمن نیتن یاھو کے دفتر کے ترجمان نے اعلان کیا ہے کہ سکیورٹی کابینہ کا اجلاس آج شام مقبوضہ بیت المقدس میں ہوگا۔ اسرائیلی ذرائع ابلاغ کے مطابق اجلاس میں غزہ شہر پر قبضے کے منصوبے، جنگ بندی پر مذاکرات اور اسرائیلی قیدیوں کی رہائی جیسے معاملات زیر غور آئیں گے۔

اس دوران اسرائیلی یرغمالیوں کے اہل خانہ نے کابینہ اجلاس کے موقع پر احتجاجی مظاہروں کی کال دی ہے۔

ہسپتال پر حملے کی تحقیقات کا مطالبہ

اقوام متحدہ نے زور دیا ہے کہ ناصر میڈیکل ہسپتال پر اسرائیلی بمباری، جس میں 20 افراد بشمول پانچ صحافی جاں بحق ہوئے، کی تحقیقات کسی واضح اور قابل اعتماد نتیجے پر پہنچنی چاہییں۔

اقوام متحدہ کے ترجمان نے کہا کہ اسرائیل پہلے بھی ایسی تحقیقات کا اعلان کر چکا ہے لیکن ان کا نتیجہ کبھی عملی اقدامات یا احتساب کی صورت میں سامنے نہیں آیا۔

جنگ کے اعداد و شمار

یہ جنگ 7 اکتوبر 2023ء کو اس وقت شروع ہوئی جب حماس نے اسرائیل پر حملہ کیا جس میں اسرائیلی اعداد و شمار کے مطابق 1219 افراد مارے گئے۔ اس کے جواب میں جاری اسرائیلی کارروائیوں کے نتیجے میں اب تک غزہ میں 62 ہزار 744 فلسطینی جاں بحق ہو چکے ہیں، جن میں اکثریت عام شہریوں کی ہے۔