سعودی وزیر خارجہ کی دوحہ اجلاس میں شرکت

سعودی وزیر خارجہ شہزادہ فیصل بن فرحان نے دوحہ میں عرب۔اسلامی ہنگامی مشترکہ اجلاس کے وزرائے خارجہ کے ابتدائی اجلاس میں شرکت کی۔ اس اجلاس میں قطر کی سرزمین پر حماس کے متعدد رہنماؤں کو نشانہ بنانے والے اسرائیلی حملے کے اثرات پر غور کیا گیا۔

قطر کی وزارت خارجہ کے مطابق دارالحکومت دوحہ میں کل (پیر کو) ہنگامی عرب۔اسلامی سربراہی اجلاس کی میزبانی کرے گا۔ وزارت خارجہ کے ترجمان ڈاکٹر ماجد الانصاری نے بتایا کہ اجلاس میں اسرائیلی حملے کے حوالے سے ایک مسودہ بیان پر بات ہوگی جو آج وزرائے خارجہ کے ابتدائی اجلاس سے منظور کیا گیا ہے۔

سعودی عرب اس سے قبل بھی اسرائیلی وزیراعظم بنجمن نیتن یاھو کے قطر کے خلاف "جارحانہ بیانات" کی شدید مذمت اور مخالفت کر چکا ہے۔ ریاض نے واضح کیا کہ وہ دوحہ کے ساتھ مکمل یکجہتی میں کھڑا ہے اور قطر کے اقدامات کی بھرپور حمایت کرتا ہے۔

بیان میں اس بات پر زور دیا گیا کہ اسرائیلی حکام کے یہ جارحانہ بیانات اور مسلسل خلاف ورزیاں نہ صرف خطرناک ہیں بلکہ بین الاقوامی قوانین اور عالمی اقدار کی کھلی پامالی ہیں۔ سعودی عرب نے عالمی برادری پر زور دیا کہ وہ اسرائیل کی ان تخریبی پالیسیوں کو روکنے کے لیے عملی اقدامات جاری رکھے۔