مصر غزہ کی تعمیر نو و ترقی کانفرنس کی میزبانی کرے گا: السیسی کا اعلان

غزہ کے لیے امن سربراہی اجلاس پیر کی شام شرم الشیخ میں شروع ہوا جس کی صدارت مصری صدر عبدالفتاح السیسی اور امریکی صدر ڈونلڈ ٹرمپ نے کی۔ صدر ٹرمپ نے سربراہی اجلاس کا افتتاح اپنے کلمات سے کیا جس میں انہوں نے شرکت کرنے والے رہنماؤں کا شکریہ ادا کیا۔ اس کے بعد امریکی رہنماؤں اور ثالثوں کی جانب سے غزہ جنگ بندی کے معاہدے پر ایک جامع دستاویز پر دستخط کیے گئے۔

اپنی طرف سے صدر السیسی نے صدر ٹرمپ کی ان جرات مندانہ کوششوں کی تعریف کی جنہوں نے غزہ معاہدے کو حاصل کرنے میں مدد کی۔ انہوں نے اس بات پر زور دیا کہ غزہ معاہدہ مشرق وسطیٰ میں امن کے ایک نئے دور کا دروازہ کھولتا ہے۔ السیسی نے اعلان کیا کہ مصر غزہ میں تعمیر نو اور ترقیاتی کانفرنس کی میزبانی کرے گا۔

مصری صدر السیسی نے کہا کہ کل کے مخالفین اگلے کل کے شراکت دار بن سکتے ہیں۔ انہوں نے زور دیا کہ فلسطینی عوام کو ایک آزاد ریاست کے اپنے حق سے لطف اندوز ہونا چاہیے۔ مصری صدر نے اس بات کی نشاندہی کی کہ امن صرف فوجی طاقت کے ذریعے حاصل نہیں کیا جا سکتا۔ انہوں نے زور دیا کہ دو ریاستی حل امن کو مستحکم کرنے کا واحد راستہ ہے۔

السیسی نے مزید کہا کہ غزہ معاہدہ ایک نئے مشرق وسطیٰ اور دو ریاستی حل کی راہ ہموار کرتا ہے۔ یہ پرامن مشرق وسطیٰ حاصل کرنے کا آخری موقع ہو سکتا ہے۔ ہم غزہ کی تعمیر نو کے ساتھ آگے بڑھنے کی بنیاد رکھیں گے۔ غزہ میں زندگی کی بحالی کے لیے صدر ٹرمپ کی کوششوں کو سراہتے ہیں۔ صدر السیسی نے اپنے کلمات کا اختتام یہ اعلان کرتے ہوئے کیا کہ وہ امریکی صدر کو امن کے لیے ان کی کوششوں کے اعتراف میں مصر کےسب سے بڑا اعزاز "نائل کالر" سے نوازیں گے۔

قبل ازیں امریکی صدر ڈونلڈ ٹرمپ پیر کے اوائل میں شرم الشیخ پہنچے جہاں انہوں نے اور مصری صدر عبدالفتاح السیسی نے غزہ امن اجلاس کی مشترکہ صدارت کی۔

السیسی نے ٹرمپ کا استقبال کیا

امریکی صدر تین گھنٹے تاخیر سے مصر پہنچے۔ وہ چھ گھنٹے سے بھی کم عرصے کے دورے کے بعد اسرائیل سے مصر پہنچے۔ ٹرمپ نے اسرائیل میں کنیسٹ سے خطاب کیا جس میں اسرائیلیوں اور فلسطینیوں کے لیے ایک "دردناک خواب" کے خاتمے کی بات کی گئی۔ مصری صدر نے امریکی صدر کی شرم الشیخ آمد سے قبل عالمی رہنماؤں اور وفود کے سربراہوں سے ملاقات کی۔ ملاقات میں اردن کے بادشاہ، فرانس اور ترکیہ کے صدور، قطر کے امیر، جرمن چانسلر، اٹلی، برطانیہ اور کینیڈا کے وزرائے اعظم اور سعودی عرب کے وزیر خارجہ شامل تھے۔

مصری ایوان صدر کے سرکاری ترجمان نے بتایا کہ یہ اجلاس غزہ کی پٹی میں جنگ بندی کے معاہدے پر عمل درآمد کے حوالے سے شریک ممالک کے درمیان ہم آہنگی پیدا کرنے کے لیے منعقد کیا گیا۔ غزہ کی تعمیر نو کی کوششیں اور انسانی امداد کی فراہمی کی بات کی گئی۔ اس سے پہلے شرکت کرنے والے وفود اس سربراہی اجلاس میں شرکت کے لیے شرم الشیخ پہنچے۔

حماس نے سربراہی اجلاس میں شرکت نہیں کی۔ اسرائیلی وزیراعظم نیتن یاہو کے دفتر نے تعطیلات کی وجہ سے دستبردار ہونے کا اعلان کردیا۔

قبل ازیں مصری ایوان صدر نے شرم الشیخ سربراہی اجلاس میں اسرائیلی وزیراعظم اور فلسطینی صدر محمود عباس کی شرکت کی تصدیق کی تھی۔ مصری ایوان صدر نے اطلاع دی ہے کہ نیتن یاہو نے آج سہ پہر کنیسیٹ پہنچنے پر صدر ٹرمپ کی موجودگی میں صدر سیسی سے فون پر بات کی۔ تاہم بعد ازاں سربراہی اجلاس میں نیتن یاہو کی شرکت منسوخ کر دی گئی۔ سفارتی ذرائع نے اطلاع دی ہے کہ امریکہ، مصر، قطر اور ترکیہ آئندہ سربراہی اجلاس کے دوران غزہ میں جنگ بندی کے معاہدے کی ضمانت دینے والی دستاویز پر دستخط کریں گے۔

یاد رہے ’’ نیل کا ہار ‘‘ ایوارڈ مصر کی سب سے اعلیٰ اور باوقار ایوارڈ ہے۔ یہ دیگر تمام آرائشوں میں سب سے اعلیٰ درجہ رکھتا ہے۔ یہ ان سربراہان مملکت اور شخصیات کو دیا جاتا ہے جو قوم اور انسانیت کی خدمت میں اپنا کردار ادا کرتے ہیں۔ اس سربراہی اجلاس کے حوالے سے مصری ایوان صدر نے ایک بیان میں اشارہ دیا کہ سربراہی اجلاس کا مقصد غزہ کی پٹی میں جنگ کا خاتمہ ہے۔

اسرائیل نے اعلان کیا ہے کہ وہ غزہ میں امن سے متعلق سربراہی اجلاس میں کوئی نمائندہ نہیں بھیجے گا اور اسرائیلی وزیر اعظم بنجمن نیتن یاہو کے دفتر کے ترجمان نے کہا کہ کوئی اسرائیلی اہلکار اجلاس میں شرکت نہیں کرے گا۔ حماس کے سیاسی بیورو کے رہنما حسام بدران نے بھی اس بات کی تصدیق کی تھی کہ تحریک حماس دستخط کے عمل میں حصہ نہیں لے گی۔

ویب سائٹ "ایکسیوس" کو دیے گئے بیانات میں امریکی صدر ٹرمپ نے غزہ معاہدے کو ان کی "سب سے بڑی کامیابی" قرار دیتے ہوئے کہا کہ شرم الشیخ سربراہی اجلاس کے شرکاء کی فہرست اس بات کی تصدیق کرتی ہے کہ دنیا غزہ میں امن کے لیے ان کے منصوبے پر متحد ہے۔ ٹرمپ نے شرم الشیخ امن اجلاس میں فلسطینی صدر محمود عباس کی موجودگی کو بہت اچھی بات قرار دیا۔

دو سال پرانی جنگ سے تباہ ہونے والی غزہ کی پٹی کی حکمرانی آنے والے دور میں سربراہی اجلاس کے اہم موضوعات میں سے ایک ہوگی۔

ناممکن کو ممکن بنا دیا: ٹرمپ

قبل ازیں اسرائیلی کنیسٹ کے سامنے بات کرتے ہوئے ٹرمپ نے کہا کہ ہم نے ناممکن کو پورا کر دیا۔ عرب اور اسلامی ممالک امن میں شراکت دار ہیں۔ غزہ کی پٹی میں صحت کے حکام کے مطابق غزہ پر اسرائیلی جنگ کے نتیجے میں تقریباً 68,000 فلسطینی شہید ہوگئے ہیں۔ مرنے والوں میں نصف سے زیادہ خواتین اور بچے تھے۔