بحرین میں امریکی فوجی اڈے پر حملہ ... کویت کی فضاؤں میں میزائل تباہ کر دیا گیا

امریکہ اور اسرائیل کی جانب سے ایران پر حملے کے آغاز کے بعد تہران کا رد عمل شروع ہو گیا ہے۔

بحرین نے آج ہفتے کے روز اعلان کیا ہے کہ امریکی بحریہ کے ففتھ فلیٹ کے ایک سروس سینٹر کو میزائل حملے کا نشانہ بنایا گیا ہے۔

روئٹرز کے مطابق کویت میں بھی خطرے کے سائرن سنائی دیے گئے ہیں، جبکہ سوشل میڈیا پر وائرل ہونے والی تصاویر میں کویت کی فضاؤں میں ایک میزائل کو تباہ کرتے ہوئے دکھایا گیا ہے۔ اسی طرح رائٹرز نے عینی شاہدین کے حوالے سے ابوظبی میں ایک زوردار دھماکے کی آواز سنی جانے کی اطلاع دی ہے۔

دوسری جانب قطری وزارت دفاع نے اعلان کیا ہے کہ وہ "اعلیٰ پیشہ ورانہ تیاری، سکیورٹی چوکسی اور متعلقہ اداروں کے درمیان مشترکہ ہم آہنگی کی بدولت ملکی سرزمین کو نشانہ بنانے والے متعدد حملوں کو کامیابی سے ناکام بنانے میں کامیاب رہی ہے"۔

وزارت نے ایک بیان میں تصدیق کی کہ خطرے کا سراغ لگتے ہی پہلے سے منظور شدہ سکیورٹی پلان کے مطابق کارروائی کی گئی، جس کے نتیجے میں تمام میزائل قطر کی سرزمین تک پہنچنے سے پہلے ہی گرا دیے گئے۔

بیان میں مزید کہا گیا کہ قطری مسلح افواج ملک کی سلامتی کے تحفظ اور کسی بھی بیرونی خطرے کا سختی سے جواب دینے کی مکمل صلاحیت رکھتی ہیں۔ انہوں نے اس بات کا اعادہ کیا کہ سکیورٹی صورتحال مستحکم اور مکمل کنٹرول میں ہے۔