کئی امریکی جنگی طیارے گر کر تباہ، عملہ محفوظ رہا: کویتی وزارت دفاع

کویت کی وزارت دفاع نے تصدیق کی ہے کہ آج پیر کی صبح کئی امریکی جنگی طیارے گر کر تباہ ہو گئے ہیں، تاہم ان کے عملے کے ارکان محفوظ رہے۔ یہ واقعہ ایک ایسے وقت میں پیش آیا ہے جب امریکہ اور اسرائیل کے حملے کے جواب میں ایران کی جانب سے خلیج میں مسلسل تیسرے دن حملوں کا سلسلہ جاری ہے۔

کویتی فوج کے جنرل اسٹاف کی جانب سے جاری بیان میں وزارت دفاع کے ترجمان نے بتایا کہ "آج صبح کئی امریکی جنگی طیارے گر گئے، تاہم ان کے تمام عملے کے بچ جانے کی تصدیق ہو گئی ہے"۔ بیان میں مزید کہا گیا کہ متعلقہ حکام نے فوری طور پر تلاش اور بچاؤ کی کارروائیاں شروع کر دیں، عملے کو نکال کر ہسپتال منتقل کر دیا گیا ہے جہاں ان کی حالت مستحکم بتائی جاتی ہے۔

اسی تناظر میں ایران نے پیر کے روز دوحہ، کویت، دبئی، ابوظبی اور بحرین پر میزائلوں اور ڈرونز کی نئی لہر داغی ہے۔ "العربیہ" اور "الحدث" کے نمائندے کے مطابق کویتی دفاعی نظام نے ساحلی پٹی کی فضائی حدود میں دشمن کے اہداف کا مقابلہ کیا، جبکہ اس سے قبل کویت میں دوبارہ خطرے کے سائرن گونج اٹھے۔ ذرائع نے کویت میں امریکی سفارت خانے کی عمارت سے دھواں اٹھنے کی اطلاع دی ہے، جبکہ سوشل میڈیا پر گردش کرنے والی تصاویر میں شمالی کویت میں ایک امریکی لڑاکا طیارے کے گرنے کے مناظر دکھائے گئے ہیں، تاہم اس کی تاحال کوئی سرکاری تصدیق نہیں ہوئی۔

امریکی سفارت خانے نے اپنی ویب سائٹ پر جاری کردہ وارننگ میں کہا ہے "کویت پر میزائلوں اور ڈرون حملوں کا خطرہ بدستور موجود ہے۔ سفارت خانے کا رخ نہ کریں، اپنی رہائش گاہوں کے نچلے حصوں میں کھڑکیوں سے دور رہیں اور باہر نہ نکلیں"۔ بیان میں مزید کہا گیا کہ سفارت خانے کا عملہ اپنی جگہوں پر پناہ لیے ہوئے ہے۔

اطلاعات کے مطابق کویت کی الاحمدی ریفائنری میں میزائلوں کے ٹکڑے گرے ہیں جس سے دو ملازمین معمولی زخمی ہوئے، جبکہ بحرین میں سلمان بندرگاہ کے قریب سے شدید دھواں اٹھنے کی تصاویر سامنے آئی ہیں۔ "العربیہ" اور "الحدث" کے نمائندے کے مطابق قطری دفاعی نظام نے اب تک 89 ایرانی میزائل اور 22 ڈرونز کو فضا میں ہی تباہ کر دیا ہے۔

کویت میں سول ڈیفنس کے ڈائریکٹر جنرل بریگیڈیئر محمد المنصوری نے تصدیق کی ہے کہ مسلح افواج نے ملک کے شمال میں فضائی جارحیت کا مقابلہ کیا ہے۔ انہوں نے وضاحت کی کہ ملک بھر میں سنی جانے والی دھماکوں کی آوازیں دشمن کے ڈرونز اور میزائلوں کو تباہ کرنے کے نتیجے میں پیدا ہوئیں۔ ان کا کہنا تھا کہ سلویٰ اور الرميثيہ کے علاقوں کے قریب دشمن کے فضائی حملوں کو ناکام بنا دیا گیا اور کوئی جانی نقصان نہیں ہوا۔

کویتی وزارت دفاع کا کہنا ہے کہ فضائی دفاعی دستوں نے پوری مہارت کے ساتھ دشمن کے کئی فضائی اہداف کو نشانہ بنایا۔ وزارت نے اس عزم کا اعادہ کیا کہ مسلح افواج ملکی سلامتی اور استحکام کو یقینی بنانے کے لیے اپنی ذمہ داریاں پوری کر رہی ہیں اور کسی بھی ممکنہ صورتحال سے نمٹنے کے لیے تیار ہیں۔