لبنان میں جنگ بندی ایران میں جنگ بندی جتنی اہم ہے : قالیباف

ایرانی پارلیمنٹ کے اسپیکر محمد باقر قاليباف نے اپنے لبنانی ہم منصب نبيه بری کے ساتھ ٹیلی فونک گفتگو میں کہا ہے کہ لبنان میں جنگ بندی اتنی ہی اہم ہے جتنی کہ ایران میں جنگ بندی۔

انہوں نے مزید کہا کہ ایران مذاکرات میں دشمن کو تنازع کے تمام علاقوں میں مستقل جنگ بندی پر مجبور کرنے کے لیے کام کر رہا ہے۔ انہوں نے یہ بھی کہا کہ میں لبنان کی صورتحال اور اس ملک میں جنگ بندی کے قیام کے معاملے کی مسلسل نگرانی کر رہا ہوں، اور یہ موضوع ہمارے لیے بہت اہم ہے۔

دوسری جانب لبنانی پارلیمنٹ کے اسپیکر نبيه بري نے کہا کہ اسرائیل ہمارے ملک میں حقیقی جرائم کا ارتکاب کر رہا ہے اور لبنانیوں کو بے گھر کرنے کی کوشش کر رہا ہے، اب تک بارہ لاکھ سے زائد لبنانی بے گھر ہو چکے ہیں۔

ایرانی سرکاری میڈیا کے مطابق پاکستانی فوج کے سربراہ عاصم منیر نے جمعرات کو ایرانی مجلس شوریٰ (پارلیمنٹ) کے سربراہ محمد باقر قاليباف سے ملاقات کی، جبکہ تہران اور واشنگٹن کے درمیان مذاکرات میں اسلام آباد کی جانب سے ثالثی کا سلسلہ جاری ہے۔ ٹیلی ویژن نے ملاقات کے مقام کی وضاحت نہیں کی، تاہم ایرانی ایجنسیوں نے دونوں شخصیات کی تصاویر اور ملاقات کے مناظر جاری کیے ہیں جس میں وزیر خارجہ عباس عراقچی بھی موجود تھے۔ پاکستانی وفد بدھ کے روز ایران پہنچا تھا، اس سے کچھ دیر قبل جب امریکہ نے ایران کے ساتھ دوسرے دور کے مذاکرات کے امکان کی تجویز پیش کی تھی۔

پاکستانی وزارت خارجہ کے ترجمان طاہر اندرابی نے آج جمعرات کو اس بات کی تصدیق کی ہے کہ امریکہ اور ایران کے درمیان بات چیت کے تسلسل کو یقینی بنانے کے لیے رابطے اب بھی جاری ہیں، زیر بحث مسائل میں جوہری معاملہ بھی شامل ہے۔ اندرابی نے اس بات پر بھی زور دیا کہ ان کا ملک ایران اور امریکہ کے درمیان بات چیت میں سہولت کاری جاری رکھے گا۔ انہوں نے اشارہ کیا کہ امریکہ اور ایران کے درمیان مذاکرات کے اگلے دور کی تاریخ ابھی طے نہیں ہوئی ہے۔

میڈیا ذرائع کے مطابق واشنگٹن اور تہران کے درمیان تنازع کے حل کے لیے جاری ثالثی کی کوششوں کے فریم ورک کے تحت، پاکستانی فوج کے سربراہ عاصم منیر تہران کا دورہ ختم کرنے کے بعد امریکہ روانہ ہو گئے ہیں۔