کے ایس ریلیف کا دورہ: اقوامِ متحدہ کی جانب سے غزہ میں سعودی امدادی کارروائیوں کی تعریف

اقوامِ متحدہ کے رابطہ دفتر برائے انسانی امور (اوچا) کے ایک وفد نے سعودی مملکت کی امدادی ایجنسی کے ایس ریلیف کے زیرِ انتظام امدادی منصوبوں کا دورہ کیا اور غزہ میں سعودی عرب کی کارروائیوں کی تعریف کی۔

سعودی پریس ایجنسی نے پیر کو بتایا کہ اقوامِ متحدہ کے اوچا کے وفد نے کے ایس ریلیف کی سہولیات اور امداد کی تقسیم کے مقامات کا دورہ کیا جیسا کہ جاری تنازعہ کے دوران حالاتِ زندگی بدستور خراب ہو رہے ہیں۔

اوچا کے عہدیداروں نے سعودی امداد سے چلنے والی کارروائیوں کے پیمانے اور تنوع کے ساتھ ساتھ بے گھر اور کمزور فلسطینیوں کے لیے امدادی ترسیل کے طریقہ کار کو سراہا۔

وفد نے غزہ میں کے ایس ریلیف کے مرکزی باورچی خانے سے اپنے دورے کا آغاز کیا جو بے گھر افراد کےکیمپوں میں رہنے والے خاندانوں کے لیے روزانہ تقریباً 25,000 تازہ کھانے تیار کرتا ہے۔

عہدیداروں نے خوراک کی تیاری، پیکجنگ اور تقسیم کے عمل کا مشاہدہ کیا جو غزہ میں کے ایس ریلیف کے شراکت دار سعودی سنٹر فار کلچر اینڈ ہیریٹیج کے ساتھ مل کر کی جاتی ہے۔

اس میں خوراک کی تقسیم کے مقامات کا دورہ بھی شامل تھا جہاں امدادی کارکنان علاقے کے مختلف حصوں میں خاندانوں کو غذائی ترسیل کی نگرانی کرتے ہیں۔

یہ دورہ اس وقت ہوا جب سعودی فنڈ ریزنگ مہم کے تحت کے ایس ریلیف کا ایک نیا امدادی قافلہ غزہ میں داخل ہوا جس کا مقصد غذائی تحفظ بڑھانا اور تنازعہ کی وجہ سے پیدا ہونے والی قلت کو کم کرنا ہے، ایس پی اے نے گذشتہ ہفتے بتایا۔

سعودی عرب نے کے ایس ریلیف کے ذریعے غزہ میں گذشتہ سال کے دوران انسانی امدادی کارروائیاں بڑھائی ہیں جن میں غذائی امداد، ہنگامی امداد اور پانی کے بنیادی ڈھانچے کے منصوبے شامل ہیں۔

اکتوبر 2025 میں کے ایس ریلیف نے خان یونس اور وسطی غزہ میں تقریباً 300,000 لوگوں کو پینے کا صاف پانی فراہم کرنے کے لیے ڈی سیلینیشن اقدام کے پہلے مرحلے کا افتتاح کیا۔

عالمی ادارے کی ایجنسیوں بشمول اقوامِ متحدہ کی انروا، اوچا، یونیسیف اور یو این ڈی پی کے نمائندگان نے ڈی سیلینیشن منصوبے کے آغاز میں شرکت کی اور انکلیو میں پانی اور صفائی کی خدمات بہتر بنانے کے لیے اس کے تعاون کی تعریف کی۔

جیسا کہ امدادی گروپوں نے خوراک، صاف پانی اور بنیادی خدمات کی شدید قلت سے خبردار کیا ہے تو اوچا کے تازہ ترین دورے سے سعودی امدادی ایجنسیوں اور غزہ میں کام کرنے والی بین الاقوامی انسانی تنظیموں کے درمیان بڑھتی ہوئی ہم آہنگی نمایاں ہوئی۔