ایران نے امریکہ اور اسرائیل کی مشترکہ جنگ کی وجہ سے تباہی کے نتیجے میں بند ہو جانے والی سٹاک ایکسچینج مارکیٹ کو منگل کے روز سے دوبارہ کھول لیا ہے۔ جنگ کے باعث سٹاک ایکسچینج کو طویل بندش کا سامنا رہا۔
مقامی میڈیا کے مطابق تہران سٹاک ایکسچینج تقریبا 80 روز تک بند رہی اور اس میں کوئی کاروبار نہ ہوسکا۔ تاہم منگل کے روز سے اس نے اپنی سرگرمیاں دوبارہ شروع کر دی ہیں۔ جنگ بندی کا اعلان ہونے کے باوجود سٹاک ایکسچینج مارکیٹ ابھی تک اپنی سرگرمیاں جاری نہ کر سکی تھی۔
بتایا گیا ہے کہ تہران سٹاک ایکسچینج میں حصص کا کاروبار 28 فروری سے ہی بند ہو گیا تھا۔ امریکہ و اسرائیل کے حملوں کے جواب میں ایران نے اسرائیل کے اندر تک میزائل فائر کرنے کے علاوہ خطے میں امریکی فوجی اڈوں کو نشانہ بنایا اور اڑوس پڑوس کے ملکوں میں بھی جگہ جگہ میزائل داغے۔
امریکہ نے اس سے پہلے ہی ایران کی سٹاک ایکسچینج مارکیٹ کو پابندیوں کا نشانہ بنا رکھا ہے۔ اس وجہ سے ایرانی سٹاک ایکسچینج مارکیٹ کا بین الاقوامی سٹاک ایکسچینج مارکیٹ سے تعلق واجبی سا رہ گیا ہے۔
سرکاری خبر رساں ادارے 'ارنا' کے مطابق جنگ کی وجہ سے 40 کمپنیوں کے حصص کا کاروبار متاثر ہوا ہے۔ ان میں کیمیکل اور دھاتوں سے متعلق شعبوں کی کمپنیاں بھی بطور خاص شامل ہیں۔ یہ کمپنیاں مارکیٹ دوبارہ کھلنے کے باوجود اپنا کام جاری نہیں کر سکیں گی۔
