لبنانی صدر جوزف عون نے اسرائیل کے ساتھ جنگ بندی تک پہنچنے کی ضرورت پر زور دیا ہے۔ یہ بات انہوں نے امریکی وزیر خارجہ مارکو روبیو کے ساتھ فون پر بات چیت کے دوران کہی۔
روبیو نے اپنی طرف سے اس بات پر زور دیا کہ حزب اللہ کو اپنے حملے فوری طور پر روکنے چاہئیں۔ جوزف عون نے روبیو کی طرف سے موصول ہونے والی فون کال کے دوران جنگ بندی تک پہنچنے کے لیے تمام ممکنہ کوششیں کرنے کی ضرورت پر زور دیا کیونکہ یہ کسی بھی دوسرے قدم کی طرف بڑھنے کا بنیادی راستہ ہے۔
لبنانی صدر نے بات چیت کے دوران کہا کہ جنگ بندی مختلف زیر غور معاملات اور مسائل کو حل کرنے کے لیے مناسب حالات تیار کرنے کا ایک ضروری راستہ ہے۔ لبنانی صدارت کے مطابق روبیو نے پچھلی واشنگٹن ملاقاتوں کے نتائج کو مستحکم کرنے کے لیے اپنی کوششیں جاری رکھنے کے امریکی انتظامیہ کے عزم کا اعادہ کیا۔ ساتھ ہی لبنان کے استحکام، آزادی، اس کی پوری سرزمین پر خودمختاری اور اپنی تقدیر کا فیصلہ کرنے کے اس کے فطری اور مکمل حق کی بھی حمایت کی۔
دوسری طرف امریکی محکمہ خارجہ نے ایک بیان میں کہا ہے کہ مارکو روبیو نے اسرائیل کے ساتھ براہ راست مذاکرات کی کوششوں میں لبنانی صدر جوزف عون کی ہمت اور ویژن کی تعریف کی اور کہا کہ حزب اللہ لبنانی عوام کی قیمت پر ان مذاکرات میں رکاوٹ ڈالنے کی کوششیں جاری رکھے ہوئے ہے۔
امریکی وزیر خارجہ نے اس بات کا اعادہ کیا کہ جاری لڑائی کی پوری ذمہ داری حزب اللہ پر عائد ہوتی ہے اور انہوں نے تناؤ میں کمی کو ممکن بنانے کے لیے حزب اللہ کی جانب سے اپنے حملے اور اشتعال انگیزیاں فوری طور پر روکنے کی ضرورت پر زور دیا۔ روبیو نے اصرار کیا کہ امریکہ لبنان کی حکومت کی اس وقت مکمل حمایت کرتا ہے جب تک وہ امن، تعمیر نو اور اپنے عوام کے لیے ایک بہتر مستقبل کی تعمیر کے لیے اس تاریخی موقع سے فائدہ اٹھانے کی کوشش کر رہی ہے۔
یاد رہے امریکہ لبنان اور اسرائیل کے درمیان براہ راست مذاکرات کی سرپرستی کر رہا ہے۔ امریکی صدر ڈونلڈ ٹرمپ نے گزشتہ 16 اپریل سے لبنان اور اسرائیل کے درمیان جنگ بندی کا اعلان کیا تھا۔ یہ جنگ گزشتہ 2 مارچ سے لبنان کو نشانہ بنانے والے شدید اسرائیلی فضائی حملوں کے بعد شروع ہوئی تھی۔ جنگ بندی میں 15 مئی کو 45 دنوں کی توسیع کی گئی تھی تاہم اسرائیل لبنان پر اپنے حملے جاری رکھے ہوئے ہے اور حزب اللہ بھی جنگ بندی کی خلاف ورزی کر رہی ہے۔
