وزیراعظم پاکستان کی شاہ سلمان سے ملاقات، خلیج کی صورتحال پر تبادلہ خیال

پاکستان کے وزیراعظم نوازشریف نے سعودی عرب کے فرمانرواشاہ سلمان بن عبدالعزیز سے ملاقات کی اور ان سے خلیجی ممالک میں حالیہ کشیدگی پر تبادلہ خیال کیا۔

العربیہ نیوز چینل کے مطابق وزیراعظم نوازشریف سعودی عرب کے مختصر دورے کے بعد رات گئے وطن واپس پہنچ گئے۔ ڈپٹی گورنرعبداللہ بن بندر نے وزیراعظم نوازشریف کورخصت کیا۔

وزیراعظم نوازشریف نے سعودی شاہ سلمان بن عبدالعزیز سے ملاقات کی اور ان سے خلیجی ممالک میں حالیہ کشیدگی پر تبادلہ خیال کیا۔ وزیراعظم سعودی شاہی محل پہنچے تو سعودی فرمانروا شاہ سلمان بن عبدالعزیز نے خود مرکزی دروازے پر آ کر وزیراعظم کا استقبال کیا۔

اس سے قبل وزیراعظم نوازشریف مختصر دورے پر سعودی عرب پہنچے تو آرمی چیف جنرل قمرجاوید باجوہ، مشیر خارجہ سرتاج عزیز، وزیر خزانہ اسحق ڈار اور دیگر بھی وزیر اعظم کے ہمراہ تھے۔ جدہ ایئرپورٹ پر گورنر مکہ اور شاہ سلمان کے مشیر شہزادہ فیصل بن عبدالعزیز نے وزیراعظم اور آرمی چیف کا خیر مقدم کیا۔