دوسری شادی رچانے والا سعودی پہلی بیوی کے ہاتھوں قتل

سعودی عرب کے شمال میں واقع سرحدی علاقے الجوف میں ایک خاتون نے اپنے شوہر کو دوسری شادی کرنے پر گولیاں مار کر قتل کردیا ہے۔

العربیہ نیوز کی رپورٹ کے مطابق خاتون اپنے خاوند کی دوسری خاتون سے شادی پر نالاں تھی اور اس نے اس شادی کے چند روز کے بعد ہی اپنے شوہر اور اس کی نوبیاہتا دُلھن پر اندھا دھند فائرنگ کردی۔خاوند کو متعدد گولیاں لگی تھیں جس سے وہ موقع پر ہی ہلاک ہوگیا ہے اور اس کی دوسری بیوی کو شدید زخمی حالت میں اسپتال منتقل کردیا گیا جہاں اس کی حالت تشویش ناک بتائی جاتی ہے۔

واضح رہے کہ سعودی عرب میں مردوں کو بیک وقت چار تک شادیاں کرنے کی اجازت ہے لیکن بعض اوقات دوسری یا تیسری شادی بیوی کی فائرنگ کا نشانہ بننے والے اس خاوند کی طرح مرد حضرات کے لیے مشکلات کا سامان لے کر بھی آتی ہے اور ان کے ہنستے بستے گھر اجڑ جاتے ہیں۔