پی آئی اے کا بعد از حج فلائٹ آپریشن شروع، عازمینِ حج وطن واپس آنے لگے

پاکستان انٹرنیشنل ایئرلائنز (پی آئی اے) نے ہفتے کے روز بعد از حج فلائٹ آپریشن کا آغاز کر دیا جس کے تحت پاکستانی عازمین کا پہلا گروپ سعودی عرب سے وطن واپس پہنچ گیا۔

قومی مسافر بردار ایئرلائن دسیوں ہزار عازمین کو وطن واپس لانے کے لیے ایک ماہ کا فلائٹ آپریشن کرے گی جو 30 مئی سے 30 جون تک جاری رہے گا اور سعودی شہروں جدہ اور مدینہ منورہ سے پاکستانی عازمین کو پورے ملک کے مختلف مقامات تک پہنچایا جائے گا۔

ایئرلائن نے ایک بیان میں کہا، "پی آئی اے نے اپنا بعد از حج آپریشن 30 مئی سے شروع کر دیا ہے۔ حج سے واپسی کی پہلی پرواز عازمین کو لے کر وطن واپس پہنچ گئی ہے۔"

ایئر لائن نے کہا، پرواز پی کے 742 جدہ سے 114 مسافروں کو لے کر اسلام آباد پہنچی جہاں ایئرپورٹ کے چیف آپریٹنگ آفیسر آفتاب گیلانی نے دیگر اعلیٰ حکام کے ہمراہ حجاج کرام کا استقبال کیا۔ جبکہ دوسری حج پرواز پی کے 732 ہفتے کے روز رات کو جدہ سے لاہور کے لیے روانہ ہونا تھی۔ کراچی کی پہلی بعد از حج پرواز پی کے 860 جدہ سے 31 مئی کو پہنچے گی۔

پی آئی اے نے کہا ہے کہ آپریشن کے دوران وہ جدہ اور مدینہ سے اسلام آباد، لاہور، کراچی، فیصل آباد، ملتان، سیالکوٹ اور کوئٹہ کے لیے پروازیں چلائے گی۔ جبکہ اگلے ماہ کے دوران ایئرلائن کل 213 پروازیں چلانے اور 53,000 سے زائد زائرین کو پاکستان واپس لانے کا ارادہ رکھتی ہے۔