خرطوم میں ایک ٹاور پربمباری سے’العربیہ‘ کے دفاتر متاثر،عملہ محفوظ

کل اتوار کی شام سوڈان کے دارالحکومت خرطوم میں النیلین ٹاورز جہاں العربیہ اور الحدث چینلز کے دفاتر واقع ہیں پر بمباری کی گئی۔

بمباری سے "العربیہ" اور "الحدث" کے دفاتر کو نقصان پہنچا، تاہم کوئی جانی نقصان نہیں ہوا۔

سوڈان میں فوج کے دو دھڑوں میں تین دن سے جاری لڑائی کے دوران تنازع کے سفارتی حل اور جنگ بندی کے مطالبات کے باوجود متحارب فریقین کے درمیان جھڑپیں جاری ہیں۔

سوڈان میڈیکل ایسوسی ایشن نے کہا کہ جھڑپوں میں کم از کم 56 شہری مارے گئے۔ حریف افواج میں مزید درجنوں ہلاکتیں ہوئی ہیں۔ سوڈان ڈاکٹرز سنڈیکیٹ نے کہا کہ تقریباً 600 زخمی ہیں جن میں عام شہری اور جنگجو شامل ہیں۔

یہ جھڑپیں ہفتے کی صبح دارالحکومت اور دیگر علاقوں میں شروع ہوئیں، جس سے وسیع تر تصادم کا خدشہ پیدا ہو گیا۔ یہ جھڑپیں کئی مہینوں تک فوج اور سریع الحرکت فورسز کے درمیان بڑھتی ہوئی کشیدگی کے بعد ہوئی ہیں۔