تونس: شادی کی رات بدقسمت دولہا کو گرفتار کرلیا گیا

شادی کی پہلی رات زندگی کی وہ رات ہوتی ہے جس کا خواب منگنی کرنے والا ہر شخص دیکھتا ہے تاہم تونس میں ایک بدنصیب نوجوان کو اس حوالے سے بڑی مشکل کا اس وقت سامنا کرنا پڑ گیا جب نوجوان کو شادی کے دن گرفتار کرلیا گیا۔

واقعہ دارالحکومت میں پیش آیا۔ شادی میں شریک افراد کا جھگڑا ہوا اور دولہا کی کار کی ٹکر سے ایک نوجوان جاں بحق ہوگیا۔ قتل کے شبہ میں دولہا کو گرفتار کرلیا گیا۔

مقامی ریڈیو ’’ موزاییک‘‘ کی ویب سائٹ کی رپورٹ کے مطابق تونس میں دولہا کو اس کی شادی کی رات ایک نوجوان کے قتل میں ملوث ہونے کے شبہ میں گرفتار کرلیا گیا۔ مرنے والا نوجوان کار سے ٹکرا گیا تھا۔ یہ ٹکر شادی ہال کے قریب ہوئی تھی۔

واقعہ کے حالات کے مطابق جمعرات کی رات دیر گئے شادی ہال کے آس پاس شادی میں موجود افراد کے دو گروپوں کے درمیان جھگڑا شروع ہوگیا۔ ملزم دولہا گاڑی میں بیٹھا اور اس نے بہت تیزی سے مخالف سمت گاڑی چلا دی جس کی زد میں آکر نوجوان ہلاک ہوگیا۔