شام کے لیے امریکہ کے نمائندہ ٹام بیرک نے ہفتہ کے روز بتایا ہے کہ امکانی طور پر شامی صدر احمد الشرع کے امریکہ کے دورہ کی تیاری یے اور وہ واشنگٹن میں امریکی صدر ڈونلڈ ٹرمپ سمیت اہم امریکی حکام سے ملاقاتیں کریں گے۔
ٹام بیرک نے ہفتہ کے روز بحرین میں جاری سالانہ 'گلوبل سیکیورٹی اینڈ جیوپولیٹیکل کانفرنس' کی سائیڈ لائنز میں رپورٹرز سے گفتگو کرتے ہوئے کہا انہیں امید ہے کہ شامی صدر کے دورہ امریکہ کے دوران شام امریکی قیادت میں داعش کے خلاف جنگ کا حصہ بن جائے گا۔ تاکہ خطے سے داعش کا خاتمہ کیا جا سکے۔
احمد الشرع ماہ ستمبر میں جنرل اسمبلی کے اجلاس سے خطاب کرنے کے لیے امریکہ گئے تھے۔ یہ پچھلی کئی دہائیوں کے ںعد کسی شامی صدر کا جنرل اسمبلی سے پہلا خطاب تھا۔ اب محض دو ماہ بعد وہ دوبارہ امریکہ کے دورے پر جا رہے ہیں۔
8 دسمبر 2024 کو اقتدار سنبھالنے کے بعد سے احمد الشرع کئی اہم ملکوں کے دورے کر چکے ہیں۔ ان میں امریکہ کے علاوہ روس اور سعودی عرب بطور خاص شامل ہیں۔
شام پر عائد کئی قسم کی پابندیاں بھی امریکہ و یورپی ملکوں نے ختم کر دی ہیں اور بشار الاسد کے دور میں ہونے والی تباہی سے نمٹنے کے لیے شام کی تعمیر نو کے لیے بھی مختلف پہلوؤں پر کام جاری ہے۔
