"لاسانتے" جیل میں داخل ہونےکےبعد … فرانسیسی عدالت میں سارکوزی کی رہائی کی درخواست پر سماعت

پیر کے روز پیرس کی ایک عدالت فرانس کے ایک سابق صدر نکولا سارکوزی کی درخواست کی سماعت کر رہی ہے جس میں انھوں نے اپیل کے فیصلے تک عبوری رہائی کے لیے درخواست دے رکھی ہے۔ چند ہفتے قبل انھیں لاسانتے جیل میں پانچ سالہ قید کی سزا سنائی گئی تھی، جس کی وجہ ان پر اپنی انتخابی مہم کے لیے لیبیا سے فنڈز جمع کرنے کی سازش میں ملوث ہونے کا الزام تھا۔

سارکوزی (70 سال) کو اس سازش کے سلسلے میں ملوث پایا گیا، جو ان کے مشیروں اور قریبی معاونین کی 2007 میں انتخابی مہم کے لیے معمر قذافی سے فنڈنگ حاصل کرنے کی کوششوں سے متعلق تھی۔ سابق صدر کو دیگر تمام الزامات، بشمول بد عنوانی اور غیر قانونی فنڈنگ، سے بری کر دیا گیا۔

عدالت کی جج ناتالی جافارینو نے کہا کہ سارکوزی کو دی گئی سزا فوری طور پر نافذ کی گئی، اس کی وجہ جرم کی "غیر معمولی سنگینی" تھی۔

سزا کا نفاذ پچھلے ماہ پیرس کی لاسانتے جیل میں شروع ہوا، جو ایک ایسے شخص کے لیے حیران کن زوال کی علامت ہے جو 2007 سے 2012 تک فرانس کی قیادت کر چکا ہے۔

سارکوزی نے بار بار اپنی طرف سے کسی بھی خلاف ورزی کی تردید کی اور سزا کے خلاف اپیل دائر کی۔ انھوں نے خود کو انتقام اور دشمنی کا شکار قرار دیا۔ وہ سماعت میں خود حاضر نہیں ہوں گے، بلکہ ان کی نمائندگی اپیل عدالت میں ان کے وکلاء کریں گے۔

اگر عدالت رہائی کی منظوری دیتی ہے تو سارکوزی سے ممکنہ طور پر الیکٹرانک نگرانی، ضمانت کی رقم جمع کرانے یا حکام کو باقاعدگی سے رپورٹ کرنے کے انتظامات طلب کیے جا سکتے ہیں۔

فرانسیسی اخبار "لو فیگاروں" کے مطابق اس درخواست کو پچھلی عبوری رہائی کی درخواستوں کے برعکس وسیع میڈیا اور سیاسی توجہ حاصل ہے، کیونکہ سارکوزی فرانس کی سب سے نمایاں شخصیات میں سے ایک ہیں۔