اپوزیشن تیار ... کیا وینزویلا کی "آہنی خاتون" صدر مادورو کی جگہ لیں گی ؟

وینزویلا میں اقتدار کے مستقبل پر گہرے ابہام کے بیچ امریکی خصوصی افواج کی جانب سے صدر نکولس مادورو کو رات کے وقت ان کی رہائش گاہ “فورتی تیونا” سے گرفتار کیے جانے کے بعد، سیاسی صورتحال مزید پیچیدہ ہو گئی ہے۔

وینزویلا کی ممتاز اپوزیشن رہنما ماریا کورینا ماچادو نے اعلان کیا ہے کہ اپوزیشن اقتدار سنبھالنے کے لیے تیار ہے اور اس مقصد کے لیے “پہلے 100 گھنٹے اور پہلے 100 دن” کا واضح منصوبہ موجود ہے۔ انہوں نے کہا کہ ملک کے عوام ایک سال قبل اپنا رہنما منتخب کر چکے ہیں، اور ایڈمنڈو گونزالیس اوروتیا کو “منتخب صدر” قرار دیا۔

ماچادو نے عالمی برادری سے اپیل کی کہ وہ قانون کے نفاذ کے معاملے میں امریکہ کے ساتھ ہم آہنگی پیدا کرے، اور مختلف ممالک سے مطالبہ کیا کہ وہ مادورو اور ان کے قریبی افراد سے منسوب مبینہ مجرمانہ نیٹ ورکس سے متعلق معلومات منظر عام پر لائیں۔

ادھر بعض مبصرین کا خیال ہے کہ مادورو کی جگہ ماریا کورینا ماچادو اقتدار سنبھال سکتی ہیں، تاہم وینزویلا کے آئین کے مطابق ایسی صورت میں نائب صدر ڈیلسی رودریگز کو صدارت ملنی چاہیے۔ یورپی یونین نے بھی واضح کیا ہے کہ وہ وینزویلا میں اقتدار کی تبدیلی صرف پر امن اور قانونی طریقے سے چاہتی ہے۔

واضح رہے کہ ماریا کورینا ماچادو کو اکتوبر 2025 میں وینزویلا میں جمہوری حقوق کے فروغ اور پر امن سیاسی تبدیلی کی جدوجہد پر نوبیل امن انعام دیا گیا تھا۔

امریکی ذرائع کے مطابق صدر ڈونلڈ ٹرمپ نے چند روز قبل مادورو کی گرفتاری کی منظوری دی تھی، جبکہ سی آئی اے نے ان کی نقل و حرکت کی نگرانی کی۔ بعد ازاں امریکی وزارت انصاف نے مادورو اور ان کی اہلیہ پر نیویارک میں الزامات عائد کیے، اور ٹرمپ نے عندیہ دیا کہ وینزویلا کی قیادت کے لیے ماچادو کے کردار پر غور کیا جا سکتا ہے۔