کریملن کے اعلان کے مطابق شام کے صدر احمد الشرع آج بدھ کے روز ماسکو روانہ ہوں گے جہاں وہ اپنے روسی ہم منصب ولادی میر پوتین سے ملاقات کریں گے۔
کریملن نے ایک بیان میں واضح کیا ہے کہ دونوں رہنما مختلف شعبوں میں دو طرفہ تعلقات کی موجودہ صورت حال اور ان کے فروغ کے امکانات پر تبادلہ خیال کریں گے۔ اس کے علاوہ مشرق وسطیٰ کی موجودہ صورت حال پر بھی بات چیت کی جائے گی۔ یاد رہے کہ شامی صدر کا ماسکو کا یہ پہلا دورہ نہیں ہے، وہ اس سے قبل 15 اکتوبر 2025 کو بھی وہاں جا چکے ہیں جب انہوں نے کریملن پیلس میں روسی صدر سے ملاقات کی تھی۔
بشار الاسد کی حکومت کے خاتمے کے بعد سے،احمد الشرع کی قیادت میں دمشق نے ماسکو کی طرف ایک مفاہمانہ لہجہ اختیار کیا ہے۔ اسد کے زوال کے چند ہفتوں بعد روس نے اپنے عہدے داروں کو دمشق بھیجا تھا۔ اس کے بعد اکتوبر 2025 میں احمد الشرع نے ماسکو کا دورہ کیا جہاں صدر پوتین نے ان کا گرمجوشی سے استقبال کیا۔
روس شام میں طرطوس میں اپنے بحری اڈے اور حمیمیم میں فضائی اڈے کے مستقبل کو یقینی بنانے کی کوشش کر رہا ہے، جو کہ سابق سوویت یونین کے دائرہ کار سے باہر اس کے واحد فوجی ٹھکانے ہیں۔ شام میں موجود یہ دونوں اہم روسی اڈے دونوں ممالک کی سیاسی بحث کا مستقل حصہ رہے ہیں۔
احمد الشرع کے اس دوسرے دورے سے قبل، روسی وزارت خارجہ نے شمالی اور مشرقی شام کی تازہ ترین پیش رفت اور سیرین ڈیموکریٹک فورسز (SDF) کے ساتھ جاری تصادم پر تبصرہ کرتے ہوئے شام کی خود مختاری اور علاقائی سالمیت کے احترام کی توثیق کی ہے۔
