سال 2028 کے انتخابات کا امیدوار ... ٹرمپ کا وینس یا روبیو میں سے کسی ایک کی حمایت سے انکار

امریکی صدر ڈونلڈ ٹرمپ نے اس بحث پر کوئی بھی موقف اختیار کرنے سے انکار کر دیا ہے کہ 2028 کے صدارتی انتخابات میں ریپبلکن مہم کے لیے ان کا جانشین کون ہو گا، نائب صدر جے ڈی وینس یا وزیر خارجہ مارکو روبیو۔

اوہائیو سے سابق ریپبلکن سینیٹر جے ڈی وینس نے کہا ہے کہ وہ نومبر میں ہونے والے مڈ ٹرم انتخابات کے بعد ڈونلڈ ٹرمپ سے اپنے ممکنہ طور پر امیدوار بننے کے حوالے سے بات کریں گے۔

ریپبلکن پارٹی کے اندرونی حالات سے با خبر ذرائع کے درمیان یہ قیاس آرائیاں بھی گردش کر رہی ہیں کہ فلوریڈا سے سابق سینیٹر مارکو روبیو بھی امیدوار بننے کی کوشش کر سکتے ہیں۔ یاد رہے کہ روبیو نے 2016 میں ریپبلکن پارٹی کی جانب سے صدارتی امیدوار بننے کی کوشش کی تھی لیکن وہ ڈونلڈ ٹرمپ سے ہار گئے تھے۔

روبیو نے 2028 کے انتخابات میں حصہ لینے کے امکان کو مسترد نہیں کیا، تاہم انہوں نے وینس کو ایک ممکنہ مضبوط امیدوار قرار دیتے ہوئے ان کی تعریف کی ہے۔

بدھ کے روز NBC News کو دیے گئے ایک انٹرویو میں جب ڈونلڈ ٹرمپ سے وینس اور روبیو کے بارے میں پوچھا گیا تو انہوں نے کہا کہ وہ اپنے جانشین کی حمایت کی طرف "مائل" ہوں گے، لیکن انہوں نے یہ بھی ذکر کیا کہ وہ فی الحال اس موضوع پر بات نہیں کرنا چاہتے۔
ڈونلڈ ٹرمپ نے مزید کہا "ہمارے پاس ابھی تین سال باقی ہیں۔ میں اس بحث میں نہیں پڑنا چاہتا، جیسا کہ آپ جانتے ہیں، میرے پاس دو ایسے لوگ ہیں جو شاندار کام کر رہے ہیں۔ میں ان کے درمیان کسی بحث یا 'لڑائی' کا لفظ استعمال نہیں کرنا چاہتا، یہ کوئی لڑائی نہیں ہوگی۔ لیکن دیکھیں، جے ڈی بھی لاجواب ہیں اور مارکو بھی لاجواب ہیں۔"

ڈونلڈ ٹرمپ اکثر ان دونوں شخصیات کے ایک ہی انتخابی پرچے پر مل کر الیکشن لڑنے کی ضرورت پر بات کرتے ہیں۔ 2028 کے انتخابات ریپبلکن اور ڈیموکریٹک دونوں جانب سے ایک کھلا مقابلہ ہوں گے اور توقع ہے کہ یہ مقابلہ انتہائی سخت ہوگا۔

مارکو روبیو کی طرف ممکنہ اشارہ کرتے ہوئے ڈونلڈ ٹرمپ نے ان دونوں کے بارے میں کہا: "میں کہوں گا کہ ان میں سے ایک دوسرے کی نسبت تھوڑا زیادہ سفارتی (diplomatic) ہے۔" انہوں نے ان دونوں کو انتہائی ذہین قرار دیا۔

امریکی صدر کا مزید کہنا تھا "میرا خیال ہے کہ دونوں کے انداز میں فرق ہے، جو آپ خود بھی دیکھ سکتے ہیں۔ لیکن دونوں ہی اعلیٰ صلاحیتوں کے مالک ہیں۔ جے ڈی اور مارکو کا اتحاد، میرے خیال میں، شکست دینا مشکل ہوگا۔ لیکن سیاست میں کوئی نہیں جانتا کہ کیا ہونے والا ہے، ہے نا؟"

اس انٹرویو کے دوران ڈونلڈ ٹرمپ ایک بار پھر غیر آئینی طور پر تیسری مدت کے لیے صدر بننے کے خیال کی طرف اشارہ کرتے ہوئے نظر آئے۔ وہ گذشتہ سال بھی یہ خیال پیش کر چکے تھے لیکن بعد میں اس سے دست بردار ہو گئے تھے۔

جب ان سے پوچھا گیا کہ کیا وہ ایسا کوئی "منظرنامہ" دیکھتے ہیں جس میں جنوری 2029 میں اگلے صدر کی مدت شروع ہونے کے وقت بھی وہ صدر رہیں، تو ڈونلڈ ٹرمپ نے جواب دیا: "میں نہیں جانتا، یہ ایک دل چسپ بات ہو گی۔"