عرب لیگ کا عراق سے ترک فوج نکالنے کا مطالبہ

عرب لیگ نے ترکی سے پر زور مطالبہ کیا ہے کہ وہ شمالی عراق میں داخل کی گئی اپنی فوج فوری طور پر وہاں سے نکالے۔

عرب لیگ کے سیکرٹری جنرل نبیل العربی کا کہنا ہے کہ شمالی عراق میں ترک فوج کی دراندازی بین الاقوامی قانون، عراق کی سالمیت اور اس کی سرزمین کی حرمت کی سنگین خلاف ورزی ہے۔ اس لیے عرب لیگ انقرہ سے مطالبہ کرتی ہے کہ وہ اپنی فوجیں عراق سےفوری طورپر واپس بلائے۔

العربیہ ٹی وی کی رپورٹ کے مطابق عرب لیگ کی جانب سے یہ مطالبہ گذشتہ روز عراق کی اپیل پر بلائے گئے وزرائے خارجہ اجلاس کے دوران سامنے آیا۔

اجلاس میں عراق کے شہر موصول کے قریب پہنچنے والی ترک فوج کے حوالے سے یکساں موقف اختیار کرنے پر تبادلہ خیال کیا گیا۔

اس موقع پر عراقی وزیر خارجہ نے ترکی کی فوجی مداخلت کی مذمت کرتے ہوئے خبردار کیا کہ بغداد انقرہ کی خلاف ورزی کا تمام ممکنہ طریقوں سےجواب دینے کا حق رکھتا ہے۔ انہوں نے کہا کہ عراق میں ترک فوج کی مداخلت عالمی قانون کی صریح خلاف ورزی ہے۔