حسن نصراللہ کے خفیہ دورہ شام کا انکشاف

لبنان کے ذرائع ابلاغ نے انکشاف کیا ہے کہ لبنانی شیعہ ملیشیا حزب اللہ کے سربراہ حسن نصراللہ نے حال ہی میں شام کا دورہ کیا تھا جہاں انہوں نے شامی حکومت کے اہم عہدیداروں سے ملاقاتیں کیں۔

لبنان سے شائع ہونے والے اخبار "النھار" نے اپنی رپورٹ میں بتایا ہے کہ حسن نصراللہ اور شامی حکومت کے عہدیداروں کے درمیان ملک کے موجودہ حالات پر صلاح مشورہ بھی ہوا۔

حسن نصراللہ کے خفیہ دورہ شام کا ایک ایسے وقت میں انکشاف ہوا ہے جب دوسری جانب لبنانی شیعہ ملیشیا شام میں باغیوں کے ساتھ لڑائی میں ہلاک ہونے والے اپنے سرکردہ کمانڈر مصطفیٰ بدرالدین کا چہلم منا رہی ہے۔

مصطفیٰ بدرالدین کوقریبا ڈیڑھ ماہ قبل شام میں بمباری کے دوران ہلاک کردیا گیا تھا۔