عدن میں کشیدگی پرعرب قیادت کے موقف کے حامی ہیں: امارات

متحدہ عرب امارات نے یمن کے عبوری دارالحکومت عدن میں پیدا ہونے والی تازہ کشیدگی پر تشویش کا اظہار کیا ہے اور کہا ہے کہ امارات عدن کے حوالے سے عرب قیادت کے موقف کی حامی ہے۔

العربیہ ڈاٹ نیٹ کے مطابق متحدہ عرب امارات کےوزیر مملکت برائے خارجہ امور انور قرقاش نے کہا کہ عدم میں رونما ہونے والے واقعات پر سعودی عرب کی قیادت میں قائم عرب اتحاد اور امارات کا موقف ایک ہے۔

’ٹوئٹر‘ پر پوسٹ ایک بیان میں انہوں نے کہا کہ عدن میں کشیدگی اور فتنہ و فساد کو ہوا دینے والے کسی ہمدردی کے لائق نہیں۔

خیال رہے کہ عدن کے طبی ذرائع کا کہنا ہے کہ جنوبی یمن کے علاحدگی پسندوں کے مسلح گرپوں اور سیکیورٹی فورسز کےدرمیان تصادم میں کم سے کم 15 افراد ہلاک ہوگئےہیں۔

ادھر یمنی وزیراعظم احمد بن دغر نے فوری فائر بندی اور عسکری فورسز کو اپنی بیرکوں میں واپسی کی ہدایت دی ہے۔ بن دغر نے زور دیا کہ "آج صبح فریقین کی جانب سے قبضے میں لیے گئے ٹھکانوں کو غیر مشروط طور پر خالی کر دیا جائے"۔

انہوں نے عدن میں کشیدگی کی ذمہ داری جنوبی علاقوں کے علاحدگی پسنددوں پرعاید کی اور کہا کہ علاحدگی پسند یمن میں حکومت کا تختہ الٹنا چاہتے ہیں۔ وزیراعظم بن دغر نے عرب ممالک پر زور دیا کہ وہ علاحدگی پسندوں کی سازش ناکام بنانے کے لیے ان کے ساتھ تعاون کریں۔ ان کا کہنا تھا کہ عدن میں بغاوت کی سازش ایران اور حوثیوں کی مدد کرنے کے مترادف ہے۔