اسرائیلی حملوں میں ایرانی وزیر دفاع اور پاسداران انقلاب کے کمانڈر جاں بحق

تین باوثوق ذرائع نے اطلاع دی ہے کہ ایرانی وزیر دفاع امیر نصیر زادہ اور پاسداران انقلاب کے کمانڈر محمد باکپور اسرائیلی حملوں میں جاں بحق ہو گئے ہیں۔

رائٹرز کے مطابق اسرائیلی فوجی کارروائیوں سے باخبر دو ذرائع اور ایک علاقائی ذریعے نے بتایا کہ ان دونوں ایرانی حکام کے بارے میں یقین ظاہر کیا جا رہا ہے کہ وہ ان حملوں کے دوران مارے گئے ہیں۔

امیر نصیر زادہ کون ہیں؟

امیر نصیر زادہ ایران کی ممتاز ترین عسکری قیادت میں شمار کیے جاتے تھے اور انہوں نے ایک ایسے وقت میں وزیر دفاع کا عہدہ سنبھالا جب خطہ شدید تناؤ کا شکار ہے۔

ان کا تعلق باقاعدہ عسکری ادارے سے تھا اور وہ ایرانی فضائیہ میں طویل پیشہ ورانہ پس منظر رکھتے تھے۔ انہوں نے قیادت کے مختلف عہدوں پر کام کیا یہاں تک کہ وہ دفاعی فیصلے کرنے والے نظام کی بااثر شخصیات میں شامل ہو گئے۔

نصیر زادہ نے اپنے عسکری سفر کا آغاز انقلاب ایران کے بعد کیا اور فضائی امور میں مہارت حاصل کی جس کے بعد وہ ایرانی فضائیہ کے سربراہ مقرر ہوئے۔

اپنے کیریئر کے دوران ان کا نام فضائی صلاحیتوں کی ترقی اور مقامی سطح پر عسکری مصنوعات کی تیاری کے پروگراموں کو فروغ دینے سے وابستہ رہا جو تہران کی دفاعی شعبے میں خود کفالت کی پالیسی کا حصہ ہے۔

وزارت دفاع کا منصب سنبھالنے کے بعد انہوں نے اپنے خطابات میں دفاعی اور میزائل صلاحیتوں کو بڑھانے اور دفاعی نظام کی مضبوطی پر توجہ مرکوز رکھی اور اس بات پر زور دیا کہ ایران جنہیں بیرونی خطرات قرار دیتا ہے ان کے مقابلے کے لیے عسکری تیاریوں کو بلند سطح پر رکھا جائے۔

انہیں ایک روایتی سیاسی اداکار کے بجائے ایک تکنیکی عسکری شخصیت کے طور پر دیکھا جاتا تھا جو باقاعدہ فوج اور پاسداران انقلاب پر مشتمل دفاعی ڈھانچے کا حصہ تھے۔

پاسداران انقلاب کے کمانڈر

دوسری جانب محمد باکپور ایران کے نمایاں عسکری رہنماؤں میں سے ایک تھے اور وہ پاسداران انقلاب کی زمینی افواج کی قیادت کر رہے تھے۔

ان کا نام اس نسل میں ابھر کر سامنے آیا جس نے انقلاب ایران کے بعد پاسداران انقلاب کی صفوں میں تربیت پائی۔ وہ اس ادارے کے اندر ایک طویل عسکری سفر سے وابستہ رہے جو ملک میں عسکری اور سکیورٹی اثر و رسوخ کے ستونوں میں سے ایک سمجھا جاتا ہے۔

باکپور نے سنہ 2009ء سے جنرل محمد علی جعفری کے بعد پاسداران انقلاب کی زمینی فوج کی کمان سنبھالی اور انہوں نے ایک ایسے مرحلے میں اس کی قیادت کی جس میں پاسداران کے علاقائی کردار میں وسعت دیکھی گئی۔

اپنی قیادت کے دوران انہوں نے زمینی فوج کی جنگی صلاحیتوں کو بڑھانے اور غیر روایتی جنگی حکمت عملیوں کو تیار کرنے پر توجہ دی اس کے علاوہ وہ اندرونی سکیورٹی آپریشنز اور سرحدوں سے باہر پاسداران کی یونٹوں کی تعیناتی کی نگرانی بھی کرتے رہے۔

باکپور کو ایک سیاسی شخصیت کے بجائے فیلڈ کے عسکری کمانڈر کے طور پر دیکھا جاتا تھا جن کا اندرونی سکیورٹی اور علاقائی آپریشنز سے متعلق امور میں نمایاں کردار رہا۔