عراق :اربیل میں کرد اپوزیشن کے ٹھکانے پر ڈرون حملہ

شمالی عراق میں جاری سکیورٹی کشیدگی کے دوران بدھ کے روز صوبہ اربیل کے علاقے دیکلہ میں ایک مہاجر کیمپ کو ڈرون حملے کا نشانہ بنایا گیا ہے، تاہم اس واقعے میں کسی جانی نقصان کی اطلاع نہیں ملی۔

سکیورٹی ذرائع کے مطابق ایک ڈرون طیارے نے اربیل میں ایرانی کرد اپوزیشن سے وابستہ ایک مقام کو نشانہ بنایا۔

دوسری جانب ایرانی کردستان ڈیموکریٹک پارٹی کی انتظامیہ کے رکن اور پیشمرگہ سینٹر کے عہدیدار کاوہ بہرامی نے بتایا کہ پارٹی کے پیشمرگہ اہلکاروں کے خاندانوں کے لیے مختص اس کیمپ پر آج سہ پہر حملہ کیا گیا۔ انہوں نے واضح کیا کہ اس حملے میں کوئی زخمی نہیں ہوا اور نقصان صرف مادی نوعیت کا رہا، جیسا کہ روڈاو میڈیا نیٹ ورک نے رپورٹ کیا ہے۔

حملوں کا تسلسل

یہ حملہ خطے میں گذشتہ دو روز سے جاری حملوں کے سلسلے کی ایک کڑی ہے، جس کے دوران منگل کی شام صوبہ سلیمانیہ میں سورداش کیمپ پر دو ڈرون حملے کیے گئے تھے۔ ان حملوں کے نتیجے میں کردستان محنت کش جمعیت کی ایک خاتون پیشمرگہ اہلکار جاں بحق اور دو دیگر زخمی ہو گئے تھے، اس کے علاوہ کویہ کے مقام پر آزادی کیمپ کو بھی نشانہ بنایا گیا تھا۔

اس سے قبل صوبہ کردستان کے انسداد دہشت گردی کے ادارے نے اعلان کیا تھا کہ منگل کی شام ایرانی حدود سے اربیل کی جانب بھیجے گئے دو بارود بردار ڈرون طیاروں کو تباہ کر کے گرا دیا گیا تھا۔

واضح رہے کہ اربیل میں وقتاً فوقتاً ڈرون اور میزائل حملے ہوتے رہتے ہیں جن میں شہر کے ہوائی اڈے، امریکہ کی قیادت میں عالمی اتحاد کی افواج کے مراکز یا ایرانی اپوزیشن کے ٹھکانوں کو نشانہ بنایا جاتا ہے۔