سعودی تعاون، امارات نے 2 لاکھ 67 ہزار منشیات کی گولیاں کی سمگلنگ روک دی

امارات نے سعودی عرب کے تعاون سے منشیات کی تقریباً 2 لاکھ 67 ہزار گولیاں مارکیٹ میں پھیلانے سے پہلے سمگل کرنے کی کوشش ناکام بنا دی۔

امارات کی نیوز ایجنسی نے بتایا کہ منشیات کے انسداد کے قومی ادارے نے دبئی پولیس کی جنرل کمانڈ کے ساتھ ہم آہنگی کے ذریعے 'ایمفیٹامائن' منشیات کی 267300 گولیاں پکڑ لی ہیں۔ ایجنسی نے بتایا کہ ریاست کے سکیورٹی اداروں اور سعودی وزارت داخلہ، جس کی نمائندگی جنرل ڈائریکٹوریٹ آف نارکوٹکس کنٹرول کر رہا ہے، کے درمیان مشترکہ سکیورٹی تعاون اور ہم آہنگی اور دونوں اطراف کے درمیان معلومات کے تبادلے کے نتیجے میں اس مقدار کو مارکیٹ میں پھیلانے سے پہلے سمگل کرنے کی کارروائی کو ناکام بنا دیا گیا۔ سمگلنگ کی کوشش میں ملوث مجرمانہ نیٹ ورک کے ارکان کو گرفتار کر لیا گیا۔ وہ تمام ایک عرب ملک کی قومیت سے تعلق رکھتے ہیں۔

منشیات کے انسداد کے قومی ادارے نے زور دیا ہے کہ ان مجرمانہ منصوبوں کا پہلے سے تدارک اور منشیات سمگل کرنے والے نیٹ ورکس کی کوششوں کو ناکام بنانا آپریشنل انضمام، فیلڈ مانیٹرنگ، باریک بینی سے پیروی، اور علاقائی و بین الاقوامی سطح پر متعلقہ اداروں کے ساتھ مشترکہ ہم آہنگی اور معلومات کے تبادلے کی اس اعلیٰ سطح کی عکاسی کرتا ہے۔ اس سے معاشروں کے تحفظ کے نظام کو تقویت ملتی ہے اور اس وبا کی سمگلنگ اور پھیلاؤ کے طریقوں کا مقابلہ کرنے میں مشترکہ کوششیں مستحکم ہوتی ہیں۔